Foto: pexels
Qaǵıdalarǵa sáıkes, barlyq qyzmet etý merzimine jáne demobılızasııadan keıin 60 kún ishinde paıyzdar, aıyppuldar men ósimpuldar eseptelmeı tólemder boıynsha keıinge qaldyrý beriledi.
2025 jylǵy qarashadaǵy málimetter boıynsha, merzimdi áskerı qyzmetke shaqyrylǵan 21,9 myń qaryz alýshynyń ishinen 19,2 myńy qaryzdar boıynsha keıinge qaldyrý múmkindigin aldy. Berilgen keıinge qaldyrýdyń jalpy somasy 8,5 mlrd teńgeni qurady.
Keıinge qaldyrý múmkindigin alý úshin ne isteý kerek?
Qarjy naryǵyn retteý jáne damytý agenttiginiń málimetinshe, keıinge qaldyrý ótinishsiz beriledi. Áskerge shaqyrý týraly derekterdi Qorǵanys mınıstrligi kredıttik bıýroǵa, sodan keıin bankter men mıkroqarjy uıymdaryna jiberedi. Bankter men mıkroqarjy uıymdary habarlama alǵan sátten bastap kúntizbelik 15 kún ishinde keıinge qaldyrý múmkindigin usynýǵa mindetti.
Habarlaý jazbasha nemese onlaın rejıminde jeke qatysý nemese qosymsha kelisimderge qol qoıý qajettiliginsiz júzege asyrylady. Shara negizgi boryshqa jáne esepteletin syıaqyǵa qoldanylady.
Sondaı-aq keıinge qaldyrý kezeńinde aıyppuldar, ósimpuldar esepteýge jáne óndirip alý sharalaryn qoldanýǵa tyıym salynady. Áskerı bólimniń tiziminen merziminen buryn shyǵarylǵan jaǵdaıda, keıinge qaldyrý taǵy 60 kúnge saqtalady.
Keıinge qaldyrýdan bas tartýdy qalasa, qaryz alýshy jazbasha ótinishti bank habarlama alǵan kúnnen bastap kúntizbelik 14 kún ishinde jiberýge quqyly, mundaı jaǵdaıda kredıtor keıinge qaldyrýdy qoldanýdyń kúshin joıady.
Eger kredıt boıynsha sot sheshimi shyǵarylsa, tatýlasý kelisimi jasalsa nemese atqarýshylyq jazba resimdelse, keıinge qaldyrý berilmeıdi.
Keıinge qaldyrýdy avtomatty túrde almaǵan jaǵdaıda áskerı qyzmetshi qarjy uıymyna jazbasha ótinish jibere alady, másele rettelmegen jaǵdaıda bank/mıkroqarjy ombýdsmanyna jáne Qarjy naryǵyn retteý jáne damytý agenttigine júgine alady.
