Joǵary mártebeli!
Qurmetti delegattar!
Ornyqty damý maqsattaryna saı Halyqaralyq eriktiler jylyn jarııalaýǵa arnalǵan alqaly jıynda sóz sóıleý – men úshin zor mártebe.
Bul aıtýly ýaqıǵa eriktilerdiń rólin kúsheıtýge, olardyń ulttyq jáne jahandyq progreske qosatyn úlesin eseleýge baǵyttalǵan ortaq umtylysymyzdy kórsetedi.
Qazaqstan halyqaralyq seriktestermen tyǵyz yntymaqtastyq jasaı otyryp, osy bastamany kóterdi.
Eriktiler qozǵalysy Ornyqty damý maqsattaryna jetý jolyndaǵy azamattyq belsendilik pen progreske yqpal etetin izgi amaldyń jasampazdyq qýatyna aınalaryna kámil senemiz.
Qazirgideı almaǵaıyp zamanda eriktiler adam ómirin saqtaý, qıyndyqqa dýshar bolǵan jandarǵa járdemdesý, qoǵamdaǵy senim men yntymaqty nyǵaıtý arqyly asa mańyzdy mıssııa atqaryp keledi.
BUU Eriktiler baǵdarlamasy dúnıe júziniń ár qıyrynda qyzmet etedi. Álemniń túkpir-túkpirindegi adamdardy bir maqsatqa jumyldyrady.
Jer-jahandaǵy mıllıondaǵan adam Uıymnan bólek te volonterlik qyzmetke atsalysady.
«Taza Qazaqstan» jalpyulttyq aksııasy qorshaǵan ortany qalpyna keltirýge, ekologııalyq jaýapkershilik mádenıetin dáripteýge úles qosqysy keletin myńdaǵan azamatty biriktirdi. Bul joba BUU-nyń ornyqty damý salasyndaǵy jahandyq bastamalarymen úndesedi.
Osy oraıda Almaty qalasyn Birikken Ulttar Uıymynyń qoldaýymen halyqaralyq yntymaqtastyq habyna aınaldyrý nıetin quptaımyz. Ortalyq Azııa men Aýǵanstanǵa arnalǵan Ornyqty damý maqsattary jónindegi BUU О́ńirlik ortalyǵynyń qurylýy osyndaı múmkindikke jol ashty.
Bul rette Almatyda BUU Eriktiler baǵdarlamasynyń sýbóńirlik keńsesiniń ashylýy Qazaqstannyń azamattyq belsendilikti jáne jahandyq seriktestikti damytýǵa beıil ekenin kórsetedi.
Atalǵan bastamalar álemdegi syn-qaterlerdi birlesken kúsh-jiger men ózara senimniń arqasynda eńserýge bolatynyn rastaıdy.
Barsha eldiń eriktilerin BUU-nyń qorshaǵan ortany qorǵaý, áleýmettik ıntegrasııa jáne jastardy qoldaý baǵytyndaǵy bastamalaryna qosylyp, ózara tájirıbe almasýǵa jáne birlesken jobalardy júzege asyrýǵa shaqyramyz.
Qazaqstan BUU Eriktiler baǵdarlamasyna rızashylyǵyn bildiredi. Sonymen qatar jastardyń, áıelderdiń jáne shalǵaı aımaq turǵyndarynyń múmkindikterin keńeıtý úshin seriktestik aıasyn keńeıtýge úndeıdi.
Bıyl Birikken Ulttar Uıymynyń qurylǵanyna 80 jyl toldy. Osy mańyzdy kezeńde barshańyzdy ádil ári jasyl álem qalyptastyrý jolynda yntymaq-birligimizdiń berik ekenin kórsetip, adamzat ıgiligi úshin birlesip áreket etýge shaqyramyn.
Qazaqstan aıtýly jyl aıasynda jáne odan keıingi kezeńderde de áleýmettik mańyzy bar eriktiler qyzmetin qoldaý úshin BUU-ǵa múshe barlyq memleketpen jáne azamattyq qoǵammen yntymaqtasa jumys isteýge árdaıym daıyn.
