Premer-Mınıstrdiń orynbasary – Mádenıet jáne aqparat mınıstri Aıda Balaeva jastarǵa jan-jaqty qoldaý kórsetý Memleket Basshysy Qasym-Jomart Toqaevtyń memlekettik saıasattaǵy basym baǵyttarynyń biri ekenin atap ótti. «Táýelsizdik urpaqtary» granty – daryndy jastardy anyqtaýǵa baǵyttalǵan Prezıdent bastamalarynyń biri.
Komıssııa quramyna Parlament depýtattary, kórnekti ǵalymdar, mádenıet salasynyń eńbek sińirgen qaıratkerleri, medıa-sarapshylar jáne bıznes ókilderi kirdi. Aıda Balaeva komıssııa ádil sheshim qabyldaǵanyna senim bildirdi.
Komıssııa qorytyndysy nátıjesinde 6 baǵyt boıynsha eń joǵary ball jınaǵan 30 joba irikteldi.
Jeńimpazdarǵa jobalaryn júzege asyrý úshin memleket tarapynan 3 mıllıon teńge kóleminde qarjylyq qoldaý kórsetiledi.
Aıta keteıik, bıyl barlyǵy 1700 ótinim tústi. Onyń ishinde 1622 ótinim qabyldandy. Atap aıtqanda, «Bıznes» baǵyty boıynsha – 796, «Ǵylym» baǵyty – 138, «Mádenıet» baǵyty – 152, «Aqparattyq tehnologııa» baǵyty boıynsha – 211, «Medıa» baǵyty – 154, «Volonterlik» baǵyty boıynsha – 171 ótinim.
