Zeınet jasynda demeseńiz, naǵyz salamatty ómir saltyn berik ustanǵan aqsaqal. Aýyldastary «Termınator», «Temir adam» dep atap ketken. Qajymuqannyń izin qalaı jalǵastyryp keledi deısiz ǵoı?
68 jastaǵy Alshynbaı aqsaqal ıogany erkin meńgergen. Armatýrany ońaı maıystyryp, 16 kılolyq kir tasyn shynashaq saýsaǵymen kóteredi. Sportpen shuǵyldanǵanyna 30 jyldaı ýaqyt bolypty. Búgingi tańda qyr-syryn ábden tereń zerdelep alǵan. О́ıtkeni túrli qaýipti amalǵa barady. Alǵashqyda taqtaıdy syndyra bastaǵan keıipkerimiz keıinnen qyzyl kirpishti bir uryp, úgitýge kóshken. Sondaı-aq armatýrany bilegine ıip ońaı oraıdy. Ol az deseńiz, shynymen de túrli trıýk isteıdi. Tipti birneshe adam ázer kóteretin aýyr tasty zeınetker keýdesi men ishine qoıyp, ony qasyndaǵylarǵa balǵamen uryp, syndyrtady. Árıne, onyń ózindik ádis-aılasy bar. Aqsaqaldyń aıtýynsha, munyń qupııasy tynys alýdy baqylaýda eken.
«Soqqynyń aldynda deneniń ózi tas sııaqty qatty bolýy kerek. Mysaly, birdeńeni urmas buryn, siz judyryǵyńyzdy qysasyz. Sol sııaqty kúshti boıǵa jınaý kerek. Bul da tájirıbemen keledi», deıdi.
Aýyl halqynyń aqsaqalǵa degen qurmeti erekshe. О́nerin túrli merekelik is-sharalarda, ásirese Naýryz meıramynda kórsetedi aýyldastaryna. Sportqa den qoımas buryn keýdesi men aıaq-qolynda qatty aýyrsyný bolypty. Kúndelikti qalypty uıqydan da qalypty. Sodan bul syrqattyń aldyn alyp, salamatty ómir saltyn ustanýdy qolǵa alady.
Bir qyzyǵy, Alshynbaı Muqyshevty mundaı balýandyqqa eshkim jattyqtyrmaǵan. Teledıdardan da, ınternetten de úırenbegen. Osyndaı qadamǵa barýyna baǵyt bergen – kúsh atasy Qajymuqannyń kitaby.
«Teńdesi joq balýan Qajymuqan atamyz sıyrǵa deıin erkin kótergen. Keýdesine tas syndyryp, kólik súıregenin de jaqsy bilemiz. Naǵyz kúsh atasy. Sonyń as-toıdaǵy halyqqa kórsetken batyrlyǵyn, kúshin estip óstik bala kezimizden. Qyzyǵýshylyǵym bar-tuǵyn. Biraq tolyq moıyn bura almaı júrdim. Keıinnen jasym qyryqqa jýyqtap qalǵanda boıymnan syrqat sezile bastady. Qol-aıaǵym, keýde tusym syzdap, syrqyraı bastady. Sodan munan aıyǵýdyń birden-bir joly shynyǵyp, shymyr bolý ekenin uǵyndym. Mine, sodan beri otyz jylǵa jýyqtady. Kúndelikti as ishetin sekildi bir mezgil qajettiligime aınalyp úlgerdi. Allaǵa shúkir deımin. О́zimdi sergek ustap, jeńil sezinemin», deıdi Alshynbaı aqsaqaldyń ózi.
– Ákem Balýan Sholaq, Qajymuqan, Imanjúsip sekildi balýandar týraly kóp oqıdy. «Solardyń kózsiz batyrlyqtaryn qaıtalaımyn» deıdi. Bir jaǵynan jastarǵa úlgi bolǵysy keledi. Elge kóp kórine bergendi unatpaıdy, sýretke túskisi de kelmeıdi», deıdi zeınetkerdiń uly Sháken Ábjanov.
Iá, Alshynbaı aqsaqaldyń qalyby bul. Asa qatty el kózine jarqyraı túskendi jaqtyra qoımaıdy. Sodan da bolar, Qaraǵandyda kúsh ıesiniń baryn kesh estýimiz. Qysqasy, aqjaldyq «Termınatorǵa» temirdeı densaýlyq tileımiz.
Qaraǵandy oblysy,
Shet aýdany,
Aqjal kenti
