Qurmanǵazy aýdandyq mýzeıiniń málimetine súıensek, qundy jádigerdiń qatarynda qazaq jaýyngeri Ǵabdol Sahtaýovtyń maıdannan jazǵan úshbý haty bar. Ol 1902 jyly osy aýdandaǵy Qoshalaq atalatyn mekende dúnıege kelgen eken. Al 25 jasynda jergilikti turǵyndardyń saýatyn jetildirý maqsatynda mektep ashý isin qolǵa alypty. Bir jyldan keıin ózi týyp-ósken aýyldaǵy bastaýysh mektepte balalardy oqytýdy bastaǵan. Turǵyndar bul bilim ordasyn «Ǵabdol mektebi» atapty.
1942 jyldyń basynda maıdanǵa attanǵan. Sol kezde Ǵabdol Sahtaýov 40 jasta bolǵan. Al 1943 jyldyń qazan aıynda Stalıngrad túbindegi shaıqastan soń habar-osharsyz ketken.
«Mýzeıde Ǵabdol Sahtaýovtyń 1942 jyldyń 24 aqpanynda otbasyna jazǵan haty saqtalǵan. Úshburyshty hatynda áıeli Zeıneptiń, balalary Ǵabıtjan men Mahıranyń, qaryndasy Nábııanyń esimi atalady. Hatyn «Sizderge aman júrgenimdi bildirip, jalyndy, kóp-kóp saǵynyshty sálemimdi joldaımyn», degen sóılemmen bastaǵan», dep habarlady aýdandyq mýzeı qyzmetkeri.
Habar-osharsyz ketken bozdaqtyń hatyndaǵy derekke qaraǵanda, soǵysqa shaqyrylǵandar Aqtóbege 21 aqpanda jetken. Al 22 aqpannyń keshinde Ilesk degen seloǵa, 23 aqpan kúni odan 25 shaqyrym qashyqtaǵy Grıgorevkada ornalasqan shtabqa kelgen.
«Sodan 109 kisiden 8 adam – Baıgisinov, Shadııarov, Muhambetov, Isaǵalıev Lýt, Nasıhan, taǵy basqalar mınomet batalonyna bólinip, «Kazan» degen seloǵa keldik. Oıynǵa kiriskeli jatyrmyz. Gýrevten 104 adam 300-den astam atpen ketip edik. Tamaq jaǵy qymbat, astyq 150-170 som, shaı sııaqtylar joq. Temeki 25–30 som, oǵan da joq. Reti bolsa, 4–5 temeki, táýirinen, 3–4 odekolon, ıis sabyn jiberip qarańyz», delingen habarsyz ketken bozdaqtyń hatynda.
Ǵabdol Sahtaýov maıdannan joldaǵan hatyn áıeli Zeınep uzaq jyl saqtaǵan. Keıin Qurmanǵazy aýdandyq mýzeıiniń qoryna tapsyrylǵan.
«Nurjanova Zaıdaǵa aýdandyq oqý bóliminen 375 som aqshamdy alyp, úıge ber dep dokýmentimdi bergem. Qanalıev bardy ma? Elde kim bar, kim ketti? Aldaǵy ýaqytta hat jazarmyn. Eldegi meni suraǵanǵa kóp-kóp sálem. Kórgenshe kún jaqsy bolsyn. Qosh-qosh. Sahtaýov Ǵ. Adres: Chkalovskaıa oblast, Akbýlakskıı r-n, pos. «Kazana» Sahtaýový G. deseńder keledi», dep aıaqtapty hatyn.
Atyraý oblysy
