Zerger Abzal Moldabektiń áıgili «Qarlyǵashyn» áleýmettik jelidegi jurt jaqsy biledi. Ár jumysyna erekshe den qoıatyn, ásemdikpen qatar mazmunǵa aıryqsha mán beretin sheber qus sımvolıkasyn shyǵarmashylyǵyna ózek etken. Muny onyń ár týyndysynan baıqaýǵa bolady.
Ol qolónermen negizinen shyǵarmashylyq, sheberlik, jeke qyzyǵýshylyq yńǵaıynda aınalysady. Tipti keıde «myna áshekeıdi jasap bolǵan soń, satýǵa qımaı qaldym», deıdi. Ár áshekeıine taýar emes, óner týyndysy dep qaraıtyn zergerdiń mazmundy týyndylary da osynysymen suranysqa ıe.
«Zergerlik qabilet ákem jaǵynan da, anam jaǵynan da daryǵan. О́ıtkeni ákemniń qolónerge ıkemi bar. Ol kisi ınjener bolǵan. Neshe túrli qural-jabdyq oılap taýyp, solardy satylymǵa shyǵaratyn. Maǵan naǵashy jaqtan da zergerlik qarym-qabilet, qasıet berilgen. Atalarymyz dombyra jasaǵan, búrkit ustaǵan, qolónermen aınalysqan kisiler. Menińshe, ónerge jetelep ákelgen qannan berilgen qasıet dep oılaımyn. Sondyqtan zergerlik óner men úshin mártebeli jumys», deıdi ózi.
Sheberdiń aıtýynsha, elge belgili «Eligim», «Qarlyǵash» atty týyndylary qaryndastaryna arnalǵan.
«Jalpy, shabyt tynyshtyqty janǵa serik etkennen keledi ǵoı. Jan dúnıe, júrek tynyshtyǵy bul jerde úlken ról oınaıdy. Sol kezde ǵana óner ıesi ǵalamat týyndylardy jaryqqa shyǵarady», deıdi zerger.
Iá, zergerlik buıymdardy ázirleý eń áýeli sýret salýdan bastalsa kerek.
«Adamnyń oıyn, ıdeıasyn birinshi qaǵazǵa túsirip, syzyp, sodan keıin baryp jobalaımyz. Sosyn metaldan jasalǵan týyndyny taǵar kezde qanshalyqty yńǵaıly bolady dep qarastyryp kóremiz. Bárin eseptep, elep, ekshep alǵan soń tehnıkalyq jaǵyna kirisemiz. Jalpy, bir týyndyny jasaý bir aptadan bastap bir aı nemese bir jylǵa deıin sozylýy múmkin», deıdi Abzal Moldabek.
Sondaı-aq ol tapsyryspen kóp jumys istemegenin de ashyq aıtty. Negizinen qoltańba retinde qalatyn avtorlyq týyndylar jasaýdy maqsat tutqan.
«Osy kásipti bastaǵan kezde eki-úsh jyldaı tájirıbe jınaý maqsatynda tapsyrys alyp, azyn-aýlaq jumys istegenmin. Keıin ózimniń avtorlyq dızaınymdy jasaı bastadym. Sonyń ishindegi eń erekshe este qalǵany «Qarlyǵash» týyndysy boldy. О́zime erekshe unaıdy jáne kópshiliktiń kóńilinen de shyqty. Odan keıin adamnyń jas ereksheligin kóp talǵamaıdy. Jastardan bastap úlken kisilerge deıin taǵa berse bolady», deıdi zerger.
Zergerdiń alǵashqy kórmesi byltyr ótken edi. Sheber kórmede onjyldyq jumysyn qorytyndylap, «Alash Jewels» brendiniń barlyq týyndylary men «Qarlyǵash» atty jańa toptamasyn tanystyrǵany esimizde. Júzden asa dızaın, áshekeı qoıylǵan kórmeni daıyndaýǵa úsh aı ýaqyt ketken. Al jańa toptamany jasaýǵa bir jyl ýaqyt jumsapty. Avtordyń alǵashqy kórmesine Fransııa, Shveısarııa, Reseı, elimizdiń birneshe qalasynan turaqty tutynýshylary arnaıy kelgen.
«Áleýmettik jelige áshekeıdiń sýretin sala salǵanmen, onyń qundylyǵy, artynda qandaı oı men eńbek jatqany kórinbeı qalady. Sondyqtan arnaıy kórme ótkizip, jaqsylap tanystyraıyn dep sheshtim», degen edi sonda Abzal Moldabek.
Ár áshekeı-buıymynan ásemdik pen joǵary estetıkalyq talǵam, qazaqy naqysh kórinetin zergerdiń shyǵarmashylyǵy eriksiz kóz tartady. «Alash Jewels» buıymdaryn álemniń ár túkpirinen tapsyrys berip alatyn áıdik brendke aınalsa, qazaq mádenıetiniń de qanaty keńge jaıylǵany emes pe?
«Zergerlikke kásip retinde áli kirisken joqpyn. Qazir tek shyǵarmashylyq damý jolyndamyn. Osy mamandyqty oqýym, jumys isteýimdi qosqanda 15 jyldaı ýaqytym ketti. Qazaqtyń ulttyq órnekterin, mádenıetin, salt-sanasyn zergerlik óner arqyly álemge tanytqym keledi», deıdi sheber.
Aspanda qalyqtap ushar qarlyǵashtardy oımaqtaı qylyp qolymyzǵa qondyra almaspyz, sirá. Dese de Abzal Moldabektiń áıgili «Qarlyǵashtary» búginde talǵamdy ár qyzdyń súıikti áshekeıine aınalǵan.
