Sýret: nipkef.ru
Resmı derekterge súıensek, bıylǵy jyldyń alǵashqy jartyjyldyǵynda ShOB-tyń ishki jalpy ónimdegi úlesi 39,8%-ǵa jetken. Bul ótken jyldyń sáıkes kezeńimen salystyrǵanda 1,6%-dyq tarmaqqa artyq. ShOB úlesi joǵary óńirler qataryna Astana (72,3%), Almaty (59,2%), Shymkent (57,6%) qalalary kiredi. Sondaı-aq Almaty, Batys Qazaqstan, Mańǵystaý oblystarynda da bul kórsetkish aıtarlyqtaı joǵary.
Oń kórsetkishter jeke sektordaǵy belsendilik artyp, kásipkerliktiń ekonomıkalyq úderisterdegi orny aıqyndala túskenin kórsetedi. Vıse-mınıstrdiń pikirinshe, kásipkerlik salasynda jumyspen qamtylǵandar sany bıylǵy jyldyń II toqsanynda 3,8%-ǵa ósip, 4,4 mln adamdy qurady. Bul otandyq ekonomıkanyń eń serpindi damyp kele jatqan segmentteriniń biri eńbek naryǵynda da mańyzdy ról atqaratynyn bildiredi.
Taǵy bir aıta keterligi, tirkelgen ShOB sýbektileriniń 91,2%-y jumysyn sátti jalǵastyryp otyr. Bul saladaǵy turaqtylyq pen ómirsheńdiktiń joǵary deńgeıin kórsetedi.
Bıylǵy jyldyń alǵashqy jartysynda ShOB shyǵarǵan ónim kólemi 25%-ǵa artyp, 42,7 trln teńgege jetken. Eń belsendi óńirler qatarynda Astana, Almaty, Shymkent qalalary men Atyraý, Qaraǵandy oblystary bar.
О́sim bes negizgi salada baıqalyp otyr. Saýda – 12,6 trln teńge (29,6%), ónerkásip – 7,1 trln teńge (16,7%), onyń ishinde óńdeý ónerkásibi – 5 trln teńge (11,7%), qurylys – 6,4 trln teńge (15%), kólik jáne qoımalaý – 3 trln teńge (7%), aýyl sharýashylyǵy – 1,6 trln teńge (3,8%). Saladaǵy turaqty ósim kásipkerlik ekojúıesiniń birtindep kúsheıip kele jatqanyn, jeke kapıtaldyń ekonomıkalyq belsendiligi arta túskenin aıǵaqtaıdy.
Bıyl Ulttyq ekonomıka mınıstrligi Eýropalyq qaıta qurý jáne damý bankimen (EQDB)birge «Orta bıznes sýbektileriniń ınvestısııalyq tartymdylyǵyn arttyrý» baǵdarlamasyn iske asyryp jatyr.
«Ulttyq ekonomıka mınıstrligi EQDB-men birlesip «Orta bıznes sýbektileriniń ınvestısııalyq tartymdylyǵyn arttyrý» baǵdarlamasy aıasynda kásiporyndardyń óndirisin 2-3 esege arttyrýǵa baǵyttalǵan naqty jospar ázirleý jumystaryn júrgizip jatyr. Kásiporyndarǵa dıagnostıkany júzege asyrý men kásiporyndardy damytýdyń jeke josparlaryn daıyndaý jóninde qoldaý kórsetiledi», dedi vıse-mınıstr.
Orta bıznes kóbine óńdeý ónerkásibinde shoǵyrlanǵan. Bul sala metall óńdeý, jeńil ónerkásip, qurylys materıaldary, mashına jasaý, hımııa ónerkásibi sııaqty baǵyttardy qamtıdy. Búginde kóptegen kásiporyn ózderiniń qoldanystaǵy óndiristik qýatyn tolyq paıdalanbaı otyrǵandyqtan, ósim áleýeti áli de joǵary.
Kelesi jyldan bastap jańa Salyq kodeksi engiziledi. Onyń basty jańalyǵy – shaǵyn bıznes úshin jeńildetilgen deklarasııa men bólshek salyq rejimi biriktiriledi, sondaı-aq kásipkerlerge arnalǵan biryńǵaı salyq rejimi paıda bolady. Bul reforma bıznes júrgizý úderisin ońaılatyp, júktemeni azaıtyp, kásipkerlerge qolaıly ári túsinikti salyqtyq orta qalyptastyrýǵa baǵyttalǵan.
«Kelesi jyldan bastap jańa Salyq kodeksin engizýge erekshe nazar aýdaryldy. Shaǵyn bıznes úshin jeńildetilgen deklarasııa men bólshek salyq rejimi biriktirilip, shaǵyn bızneske arnalǵan biryńǵaı rejim qurylady. Jyldyq shekti tabys 600 myń AEK-ke deıin nemese 2,4 mlrd teńge kóleminde belgilenedi. Degenmen jumyskerler sanyna shekteý qoıylmaıdy. Buǵan qosa, eger jyldyq tabys 24 000 AEK-ten asqan jaǵdaıda, eńbekaqy qory somasyna salyq salynatyn tabysty azaıtý qarastyrylǵan. О́zin-ózi jumyspen qamtýshylarǵa jańa, jeńildetilgen salyq rejimi qarastyrylǵan, biryńǵaı eń tómengi tólem 4%», dedi E.Saǵynaev.
Elimizde kásipkerlikti damytýǵa arnalǵan reformalar keshendi túrde jalǵasyp keledi. ShOB sektoryndaǵy ósim kórsetkishteri oń dınamıkany aıqyndap qana qoımaı, el ekonomıkasynda jeke bıznestiń róli artyp kele jatqanyn kórsetedi. Memlekettiń orta bızneske basymdyq berýi, salyq júıesin jańǵyrtýy men halyqaralyq qarjy ınstıtýttarymen yntymaqtastyǵy – otandyq bıznestiń básekege qabilettiligin arttyrýǵa baǵyttalǵan mańyzdy qadamdar.
Eldegi bıznes-klımatty jaqsartý baǵytynda qolǵa alynǵan sharalar aldaǵy jyldary da kásipkerliktiń damýyna serpin beretini sózsiz.
