Kólik mınıstrliginiń habarlaýynsha, Parıj qalasynda Qazaqstan-Fransııa iskerlik keńesiniń otyrysy jáne ekonomıkalyq yntymaqtastyq jónindegi 16-Úkimetaralyq komıssııanyń májilisi ótti. Is-sharalarǵa Qazaqstan Respýblıkasy Kólik vıse-mınıstri Talǵat Lastaev qatysty.
Negizgi oqıǵa Airbus A320neo áýe kemelerin jetkizý jónindegi Memorandým papkalarymen almasý rásimi boldy. Qujatta «alǵashqy 25 ushaqty jetkizý jáne keıinnen qosymsha sanyn 25 ushaqqa deıin arttyrý múmkindigi» qarastyrylǵan.
Kezdesý barysynda Talǵat Lastaev pen Airbus kompanııasynyń vıse-prezıdenti Sharbel Iýzkatlı 2031 jylǵa josparlanǵan áýe kemelerin jetkizý merzimderi jáne ony jedeldetý múmkindikterin talqylady. Sondaı-aq, vıse-mınıstr Airbus-pen birlesip avıasııalyq oqý ortalyǵyn qurý jáne áýe kemelerin lızıngke berý máselelerin kóterdi.
ÚAK aıasynda halyqaralyq seriktestermen aldaǵy yntymaqtastyq máseleleri de talqylandy: TAV Airports kompanııasymen — Qazaqstan áýejaılary ınfraqurylymyn jańǵyrtý, Alstom kompanııasymen — ónerkásiptik kooperasııa baǵytynda.
Eki el arasyndaǵy kólik baılanysyn jaqsartý úshin Parıj–Astana reısin qaıta ashý jáne Shymkent–Nıssa baǵyty boıynsha áýe qatynasyn iske qosý máseleleri qarastyryldy.
