Foto: Ashyq derekkóz
A.Álnazarovanyń aıtýynsha, jalpy narkoz – kúrdeli medısınalyq emshara, ony tájirıbeli anestezıologtyń qatysýymen, qajetti qural-jabdyqtyń tolyq qamtamasyz etilýimen ǵana júrgizýge bolady.
Bas prokýratýranyń tapsyrmasy boıynsha eldegi 622 stomatologııalyq uıymǵa jospardan tys tekseris bastalǵan. Mınıstrliktiń deregine sáıkes, qazirgi tańda 290 tekseris tirkelgen, onyń 135-i aıaqtalǵan. 103 tekseris jalǵasyp jatyr, 52 uıymnyń jumysy toqtap turǵandyqtan tizimnen shyǵarylǵan, taǵy 26 nysan tekserýge tirkelý kezeńinde. Prokýratýra joldaǵan 316 klınıkanyń 34-i MÁMS aıasynda qyzmet kórsetedi, al 282-si tek aqyly negizde jumys isteıdi.
Mınıstr ata-analardy balalarǵa anestezııany «yńǵaıly tásil» retinde qarastyrmaýǵa shaqyrady.Ol uzaq narkozdyń balanyń júrek-qan tamyr, tynys alý jáne júıke júıesine qaýip tóndirýi múmkin. Keıbir jeke klınıkalardyń «barlyq tisti bir seansta emdeımiz» degen usynysy tek naqty medısınalyq negiz bolǵan jaǵdaıda ǵana oryndy ekenin atap ótti.
«Ata-analar sheshim qabyldamas buryn barlyq táýekelder men jaǵdaılar týraly tolyq aqparat alýy qajet. Balanyń qaýipsizdigi árqashan birinshi orynda turýy tıis», dedi Densaýlyq saqtaý mınıstri.
Buǵan deıin mınıstr Aqmaral Álnazarova Astanadaǵy stomatologııalyq klınıkada narkozdan keıin kóz jumǵan úsh jasar qyzǵa qatysty jaǵdaı boıynsha sevoflýran (sevoran) preparatynyń qoldanylýyna tyıym salý máselesine túsinik bergen edi. Qazir bul iske qatysty sot prosesi jalǵasyp jatyr.
