Sýret: elordainfo.kz
Oqý-aǵartý mınıstrliginiń uıymdastyrýymen ótken is-sharada elimizdiń barlyq óńirinen 825 qatysýshy jáne 719 ekspert baq synady. О́ndiristik, ınjenerlik, aqparattyq tehnologııalar, servıs, qurylys, áleýmettik qyzmetter jáne kreatıvti ındýstrııalar salasy boıynsha 45 quzyrettilik saıys ótip, jastardyń osy baǵyttaǵy biliktiligin arttyrdy.
Elimizde «WorldSkills Kazakhstan» jobasy 2015 jyldan beri ótip keledi. Jobanyń Ulttyq operatory – «Talap» KeAQ, ol Qazaqstannyń atynan «WorldSkills International» jáne «WorldSkills Europe» uıymdarynda ókildik etedi.
Memleket basshysy Qasym-Jomart Toqaev Qazaqstan halqyna Joldaýynda elimizdiń kadrlyq áleýetin birtindep arttyrý óte mańyzdy ekenin atap ótken bolatyn. Elimiz úshin qazirgi sátte bolashaqta suranysqa ıe bolatyn kásipter úshin bilikti mamandar daıarlaýdy myqtap qolǵa alý kerek ekeni sózsiz. Sondaı-aq Prezıdent sapaly bilim berý máselesine erekshe toqtaldy. Memleket basshysynyń aıtýynsha, qoǵamda eńbekqorlyq, kásibılik sııaqty qasıetter óte joǵary baǵalanýy tıis. О́z kásibin jetik meńgergen mamandar ult sapasyn arttyrýǵa kúsh qosady. Atalǵan chempıonat tehnıkalyq jáne kásiptik bilim berý júıesin damytý, jumysshy mamandyqtardyń bedelin arttyrý jáne kadr daıarlaý sapasyn jetildirý maqsatynda jyl saıyn dástúrli túrde ótkizilip keledi.
Chempıonattyń ashylý saltanatynda sóz sóılegen Oqý-aǵartý vıse-mınıstri Shynar Aqparova Memleket basshysynyń tapsyrmasymen elimizde eńbek adamynyń qoǵamdaǵy mártebesin arttyrý, tehnıkalyq jáne kásiptik bilim salasyn transformasııalaý boıynsha aýqymdy jumystar júrgizilip jatqanyn aıtty.
«Elimizdiń bolashaǵy úshin jas mamandarǵa serpin berip, áleýetin arttyrý maqsatynda uıymdastyrylyp otyrǵan bul saıystyń bereri mol. Bıylǵy Jumysshy mamandyqtar jyly tehnıkalyq jáne kásiptik bilim salasyn jańa deńgeıge kótergen erekshe jyl boldy. «WorldSkills» qozǵalysy osy mindetti júzege asyratyn jobaǵa aınaldy. Álemdik tájirıbe bul bastamanyń mıllıondaǵan jas mamannyń taǵdyryn ózgertetinin dáleldep keledi. «WorldSkills» – bilim, daǵdy, tabandylyq synalatyn úlken syn. Bul – otandyq kásiptik bilim berý salasyn álemdik standartqa jaqyndatqan reformanyń katalızatory», dedi vıse-mınıstr.
Atalǵan sheberlik saıysyna Aqtóbe, Almaty, Atyraý, Shyǵys Qazaqstan oblystarynyń jastary qatysty. Shyndyǵynda, árbir jetistik – tek jeke qatysýshynyń tabysy ǵana emes, elimizdiń kásibı sheberlik deńgeıiniń kórsetkishi. «WorldSkills Kazakhstan» elimizde kásibı standarttardy jańartýǵa, tehnıkalyq jáne kásiptik bilim berý júıesin damytýǵa, jumys mamandyqtarynyń bedelin kóterýge aıtarlyqtaı úles qosa bermek.
«WorldSkills» qozǵalysynyń elimizdegi onjyldyǵyn atap ótý – osy sharanyń basty maqsaty. Osy on jyl ishinde myqty kásibı qaýymdastyq qurylyp, stýdentter, tálimgerler jáne sarapshylar birigip, sheberlikti damytýǵa, halyqaralyq standarttarǵa sáıkes kásibı deńgeıdi kóterýge múmkindik aldy. Bul onjyldyq bolashaq urpaqqa shabyt berip, kásibı bilim men sheberliktiń mártebesin kóterýge negiz bola alady. Bir sózben aıtqanda, «WorldSkills» – adaldyqqa, syılastyqqa, kásibılikke jáne sheberlikti jetildirýge negizdelgen qozǵalys.
