«Paryz» baıqaýy – halyqtyń ál-aýqatyn jaqsartý jolyndaǵy bıznestiń qoǵam aldyndaǵy áleýmettik jaýapkershiligin aıqyndaıdy. Bıyl osy baǵytta birtalaı jumys júrgizip, óńirlerdiń ómir súrý sapasyn jaqsartý baǵytynda aýqymdy ister atqarǵan «Qazaqmys korporasııasy» úzdik dep tanyldy.
Baıqaý bas júldesiniń korporasııaǵa berilýi bekerden beker emes. «Qazaqmystyń» áleýmetti qoldaý baǵytyndaǵy qolǵa alǵan jumystary az emes.
Kompanııa 2025 jyly óńirlerdi damytýǵa jáne qyzmetkerlerdi qoldaýǵa 90 mlrd teńgeden astam qarajat baǵyttaǵan. Bul qarajat negizinen turǵyn úı, densaýlyq saqtaý, ınfraqurylymdy damytý, bilim berý, sport jáne qyzmetkerlerdi qoldaý syndy salalarǵa jumsaldy. Naqtyraq aıtqanda, «Qazaqmystyń» qarjylaı qoldaýymen Sátbaev qalasynda 320 oryndyq balabaqsha paıdalanýǵa berildi, Jezqazǵanda 8 myń sharshy metrdi quraıtyn zamanaýı sport kesheni iske qosyldy jáne osy qalada 900 balaǵa arnalǵan Shahmat akademııasy ashyldy; Tótenshe jaǵdaılar mınıstrliginiń kerek-jaraǵyn saqtaýǵa arnalǵan elimizdegi alǵashqy Avıasııalyq angar salyndy. Sondaı-aq korporasııanyń qarjylaı kómegimen Sátbaev qalasyndaǵy qoǵamdyq keńistik abattandyrylsa, Jezqazǵanda geologııalyq klaster men oqý ortalyǵy iske qosyldy. Endi aýmaǵy 4 myń sharshy metrdi quraıtyn, 200 oryndyq jataqhanasy bar iri sport kesheni paıdalanýǵa berilmek.
Ulytaý oblysy UMC klınıkalarymen birlesip, júrekke ınnovasııalyq ádispen operasııa jasaýdy qolǵa aldy. Bul da «Qazaqmystyń» kómegimen júzege asyryldy.
Kompanııa azamattardyń áleýmettik jaǵdaıyn jaqsartý baǵytynda da júıeli jumys júrgizip keledi. Aıtalyq, qyzmetkerler men olardyń otbasy múshelerin sapaly medısınalyq kómekpen qamtamasyz etý úshin erikti medısınalyq saqtandyrý baǵdarlamasyn keńeıtti. Eńbekkerlerdi turǵyn úımen qamtý máselesin de nazardan tys qaldyrmaı, 60-tan astam otbasyn jańa qyzmettik baspanamen qamtamasyz etti. Olardy qarjylaı qoldaý maqsatynda 50 AEK kóleminde syıaqy belgiledi, bul qarajat azamattarǵa toqsan saıyn beriledi. Buǵan qosa, aqshalaı júldeleri bar ártúrli baıqaýdy ótkizý de dástúrge engen.
Áleýmettik tólemder de kóbeıtilip, qosymsha kepildikter men qoldaý baǵdarlamalary engizildi, azamattardyń quqyn qorǵaıtyn jańa ujymdyq shartqa qol qoıyldy.
Korporasııa óńirlerde ómir súrý men kásibı ósý úshin jaǵdaı jasap, bilim berý, sport, mádenıet jáne ınfraqurylym nysandaryn damytýdy odan ári jalǵastyryp keledi.
«Qyzmetkerlerge, olardyń otbasyna jáne óńirdiń árbir turǵynyna qamqorlyq jasaý – bizdiń buljymas qaǵıdamyz. Árbir áleýmettik joba – bul adamdarǵa jáne aýmaqtardyń bolashaǵyna salynǵan ınvestısııa. Bul marapat – árbir qyzmetkerimizdiń, kompanııaǵa qatysy bar qalalardyń damýyna úles qosyp otyrǵan óńir turǵyndarynyń eńbegi. Men ujymǵa eńbegi, bastamashyldyǵy jáne óz isine adaldyǵy úshin shyn júrekten alǵys aıtamyn», dep atap ótti «Qazaqmys korporasııasy» JShS basqarma tóraǵasy Nurahmet Nýrıev.
«Paryz 2025» syılyǵy «Qazaqmystyń» óńirlerdiń turaqty damýy men áleýmettik turaqtylyǵyna qosyp otyrǵan úlesin rastaıdy jáne osy jumysty odan ári nyǵaıtýǵa yntalandyrady.
