Foto: Almaty oblysy ákimdigi
Qalalyq mádenıet úıi aýmaǵynda aýyl sharýashylyǵy kórmesi uıymdastyryldy. Kórmede óńirdiń agroónerkásip keshenindegi ozyq tehnologııalar, jańa ónimder jáne sharýashylyqtar jumysynyń nátıjeleri tanystyryldy.
О́ńir basshysy Marat Sultanǵazıev jınalǵandardy aıtýly merekemen quttyqtap, agrarlyq sala óńir ekonomıkasynyń mańyzdy bóligi ekenin atady. Sonymen qatar aýyl eńbekkerleriniń tabandy eńbegi men aýyl sharýashylyǵy ónimderiniń ósimin qamtamasyz etýdegi rólin joǵary baǵalady.
«Búgingi klımattyq ózgeris jaǵdaıynda sýdyń mańyzy artyp keledi. Sol sebepti biz sýarmaly jerlerdi jańǵyrtýǵa, sıfrlandyrý men únemdeý tehnologııalaryn engizýge erekshe mán berip otyrmyz. Jańa tehnologııalardy engizý tek tabıǵı resýrstardy qorǵap qana qoımaı, fermerdiń tabysyn arttyrýǵa múmkindik beredi. Bul – ónimdilikti arttyrý, sharýanyń shyǵynyn azaıtý jáne naryqtaǵy básekege qabilettilikti kúsheıtý. Biz oblys deńgeıinde osy baǵyttaǵy jobalardy qoldap, fermerlerge naqty praktıkalyq sheshimder usynamyz», dedi oblys ákimi.
Almaty oblysy elimizdegi áleýeti artyp, eń qarqyndy damyp kele jatqan óńirlerdiń biri. Bıylǵy jyly jalpy óńirlik ónim kórsetkishi ósip, burynǵy onynshy orynnan besinshi orynǵa kóterildi. Bul – strategııalyq josparlaý men aýyl eńbekkerleriniń mańdaı teriniń nátıjesi.
Mereıli mereke kúninde oblysta «Úlgili aýyl» baıqaýynyń jeńimpazdary anyqtalyp, arnaıy marapattar tabystaldy.
Baıqaý qorytyndysy boıynsha Almaty oblysynyń «Eń úlgili aýyly» nomınasııasyn Qarasaı aýdanyna qarasty Jibek joly aýyly utyp aldy. Al ekinshi oryndy Ile aýdanynyń Baıkent aýyly enshilese, úshinshi oryndy Eńbekshiqazaq aýdanynyń Ashysaı aýyly ıelendi. Atalǵan aımaqtarǵa arnaıy aýyl sharýashylyǵy tehnıkasy syıǵa tartyldy.
«Bul marapat biz úshin úlken mártebe. Endi aýylymyzdy kórkeıtý maqsatynda burynǵydan da belsendilik tanytýǵa tyrysamyz jáne bar kúshimizdi salyp eńbek etemiz», dedi Jibek joly aýyldyq okrýginiń ákimi Dıdar Nuraqynov.
Almaty oblysynyń turǵyn úı-kommýnaldyq sharýashylyq jáne abattandyrý basqarmasynyń basshysy Dımash Qojabekov baıqaýdyń maqsatyn tilge tıek etti.
«Bul baıqaý «Taza Qazaqstan» ekologııalyq mádenıetin damytý tujyrymdamasynyń is-sharasy aıasynda júrgizilip otyr. Baıqaýǵa 8 aýdannan 8 aýyl qatysty. Oblystyq komıssııa sheshimi boıynsha úsh aýyl úzdik dep tanylyp, aýyl sharýashylyǵy tehnıkalarymen marapattaldy. Arnaıy tehnıkalar ınfraqurylym jaǵdaıyn jaqsartýǵa úlken kómek beredi degen oıdamyn. Is-sharanyń negizgi maqsaty – óńirdegi aýyldyń ishindegi ınfraqurylym, sanıtarlyq tazalaý, adamdardyń arasyndaǵy ekologııalyq mádenıetti qalyptastyrýǵa úlken serpin berý», dedi ol.
Baıqaýǵa qatysýshylardyń jumysy 16 krıterıı boıynsha baǵalanǵan. Sonyń ishinde «Taza Qazaqstan» ekologııalyq aksııasy aıasyndaǵy jumystardyń uıymdastyrylýy, týrızm áleýeti, óńirdiń ekonomıkalyq-áleýmettik kórsetkishteri jáne ekologııalyq mádenıettiń damýy negizgi talaptar retinde qarastyrylǵan.
Almaty oblysy
