Foto: polisia.kz
Búginde óńirdiń 15 aýyly resmı túrde alkogol satpaıtyn jáne qoldanbaıtyn «ishimdiksiz eldi meken» mártebesin aldy. Bul sheshim jergilikti turǵyndardyń, ákimdikterdiń jáne ýchaskelik polısııa ınspektorlarynyń bastamasymen qabyldanǵan.
Aýyl jınalystarynda turǵyndar men qoǵam belsendilerdiń pikiri eskerildi. Atalǵan bastama oblystyń 10 aýdanyn qamtydy: Aqsýat, Kókpekti, Jarma, Maqanshy, Aıagóz, Úrjar, Besqaraǵaı, Jańasemeı, Borodýlıha jáne Abaı aýdandary. Barlyq eldi mekenderde turaqty polıseılik baqylaý uıymdastyrylyp, túsindirý jumystary júrgizildi.
Aýyl aqsaqaldary men jastar kóshbasshylary da is-sharalarǵa belsendi túrde tartyldy. Abaı oblysy polısııa departamentiniń basshysy Eldar Danııarov jobanyń tıimdiligin atap ótti.
«Otbasylyq-turmystyq janjaldar sany aıtarlyqtaı azaıdy, mas kúıinde jasalatyn qylmystar deńgeıi tómendedi, quqyqtyq tártipti qamtamasyz etýge aýyl turǵyndarynyń qatysýy kúsheıdi. Ishimdiksiz aýyl – bul tyıym salý emes, halyqtyń sanaly tańdaýy. Biz azamattardyń ómirin qaýipsiz ári tynysh etýge baǵyttalǵan ár bastamany qoldaımyz», dedi departament basshysy.
Aıta keteıik, alǵash bolyp bul bastamany Aqsýat jáne Abaı aýdandarynyń aýyldary qoldady, keıin ózge aýdandar da qosyldy. Árbir eldi mekende ýchaskelik ınspektorlar jergilikti atqarýshy organdarmen birlesip, jobanyń oryndalýyn qamtamasyz etti, krımınogendik jaǵdaıdaǵy ózgeristerdi baqylap, turǵyndarǵa qoldaý kórsetti.
