Foto: Vıdeodan alynǵan kadr
Ekologııa jáne tabıǵı resýrstar vıse-mınıstri Jomart Álıev otyrys barysynda shınalardy mysalǵa ala otyryp, qazirgi qaıta óńdeý júıesiniń olqylyqtaryn túsindirdi.
«Qoldanystaǵy normalarǵa sáıkes, eger Qazaqstanǵa 100 kılogramm shına kirse jáne kásiporyn onyń 30 paıyzyn qaıta óńdegenin dáleldese, oǵan tólengen ekologııalyq tólem tolyq qaıtarylady. Biz osy mejeni 40 paıyzǵa deıin birtindep kóterýdi usynyp otyrmyz. Alaıda, qazirgi jaǵdaıda 100 kılogramnyń 70 kılogramy óńdelmeı qalyp otyr. Bul qaldyqtar qaıda ketip jatyr? Olar aınalyp kelgende qorshaǵan ortaǵa túsedi. Biraq kásiporyndar 30 paıyzdy oryndaǵany úshin tolyq bosatylady. Sonda qalǵan 70 kılogrammnyń taǵdyry ne bolady?», dedi vıse-mınıstr.
Dál osy kezde sóz alǵan depýtat Edil Jańbyrshın áriptesterin kútpegen dálelimen tańǵaldyrdy. Ol birtutas 40 paıyzdyq kórsetkish barlyq qaldyq túrine birdeı qoldanylýy qısynsyz ekenin aıtyp, taldaý júrgizý úshin ChatGPT-ge júgingenin ashyq aıtty.
«Sizder barlyq qaldyqqa birdeı 40 paıyz belgilep otyrsyzdar. Biraq bul ǵylymǵa da, tájirıbege de sáıkes kelmeıdi. Men ChatGPT-den morfologııa boıynsha qaldyqtardyń álemdik qaıta óńdelý deńgeıin suradym. Mine, kórsetkishter: organıka – 5-10 paıyz, plastık – 14-20 paıyz, qaǵaz – 45–55 paıyz, shına men shyny – 20-30 paıyz, metall – 70-90 paıyz, toqyma – 10 paıyzǵa jetpeıdi. Osyny kóre tura barlyq qaldyqqa birdeı 40 paıyz qoıý durys emes, bul dıletanttyq. Ár qaldyq túrine jeke normatıv bekitý kerek», dedi depýtat.
