Ákimniń aıtýynsha, kólemdi tarıhı beınerolık elimizdiń týrıstik áleýetin arttyrýǵa baǵyttalǵan jáne kúrdeli tehnıkalyq sheshimderdi talap etedi.
«Bul – 3D-effekti bar rolık. Týrıstik áleýetimizdi kóterý úshin arnaıy ssenarıı jazylady. Biz ózge eldermen salystyrdyq: shetelde osyndaı rolıkti jasaý quny 200-300 myń dollarǵa deıin jetedi. AQSh-taǵy Universal parkinde Garrı Potter, Transformerler boıynsha jasalǵan shoý da óte qymbat. Bul jaı vıdeorolık emes ekenin túsiný qajet. Jobanyń maqsaty – týrızmdi damytý. О́kinishke qaraı, túsinbeýshilik rezonans týdyrdy», dedi Kósherov brıfıngide.
Ákimniń aıtýynsha, vıdeorolıkti daıyndaýǵa merdiger tabý da qıyn bolǵan.
«Konkýrsty úsh ret ótkizdik. Tek bir kompanııa – G7 Exclusive jaýap berdi. Munda kommersııalyq turǵydan qarasaq, bir jylda sol qarajatty qaıtaryp, ári qaraı tabys tabýǵa bolatyn edi», dep túıindedi ol.
Buǵan deıin oblys ákimi «Uly Dala eli ortalyǵy» men «G7 Exclusive» kompanııasy arasynda jasalǵan kelisimsharttyń zańdylyǵyn tekserýdi tapsyrǵan. Qujatqa sáıkes, vıdeorolık Qazaqstan tarıhyn ejelgi dáýirden búginge deıingi óner túrleri arqyly kórsetýi tıis. Ol arnaıy golografııalyq shoý-zalda kórsetiledi.
28 qarashada jasalǵan kelisimshart boıynsha jobanyń quny – 100 800 000 teńge (QQS-pen), al jumys 2025 jyldyń sońyna deıin aıaqtalýy tıis.
