О́ńirlerdi ońtaılandyrý kezinde Semeı Shyǵys Qazaqstan oblysyna qosylyp, arada shırek ǵasyr ótkende uly Abaı esimimen qaıta qurylǵanǵa deıin bul sala toqyrap, stadıondar qańyrap bos qaldy. Memleket basshysy Qasym-Jomart Toqaevtyń Abaı oblysyn qurý týraly sheshiminen keıin oblyspen qatar «Elimaı» komandasy da eńsesin tikteı bastady.
О́tken ǵasyrdyń 90-jyldaryndaǵy «Elimaı» komandasy elimizdiń kəsibı fýtbolynda birqatar rekord ornatty. Sol ýaqytta semeılik fýtbolshylar elimizdiń úsh dúrkin chempıony atandy (1994, 1995, 1998). Bir maýsymda birinshi bolyp (1995) ulttyq birinshiliktiń altynyn, sondaı-aq Qazaqstan kýbogi men sýperkýbogin ıelendi. Búginde «Elimaı» el birinshiliginiń úzdikteri qatarynda. Súıikti komandasyna degen halyqtyń yqylasy da erekshe. Bıylǵy dúbirli dodalarda ortalyq stadıon jankúıerlerge lyq toldy. Tipti syımaı, aýzy-murnynan shyǵyp qalǵan sátter kóp boldy. Búginde semeılikterge ərbir match úlken merekege aınalady. Eńbektegen baladan eńkeıgen qarııaǵa deıin aıtýly fýtbol oıynyn kútip, kassalarda uzyn-sonar kezek týdyrady. Sondyqtan da bul jańalyqty estigen semeılikterdiń bórki aspanda qalyqtap júr áli.
Prezıdenttiń qoldaýymen bastalǵan «Abaıǵa qurmet» aksııasy aıasynda elimizdiń birneshe óńiri Semeı qalasyna bir nysannan salyp berýge óz usynystaryn berdi. Mańǵystaý oblysy Dostyq úıiniń irgetasyn qalady. Shymkent qalasy shyǵarmashylyq ortalyǵy men mádenıet úıin, Túrkistan oblysy kórme ortalyǵyn, Astana qalasy «Keleshek mektebin», Aqtóbe oblysy jekpe-jek ortalyǵyn, Pavlodar oblysy ústel tennısi ortalyǵyn, Soltústik Qazaqstan oblysy rámizder alańyn, Qyzylorda oblysy «Anaǵa taǵzym» ortalyǵyn, Batys Qazaqstan oblysy jelilik saıabaq salýdy, Shyǵys Qazaqstan oblysy Ertis jaǵalaýyn abattandyrýdy josparlap otyr. Osyndaı ıgi bastamalar aıasynda Semeı qalasynda 25 myń oryndyq stadıonnyń qurylysy bastaldy.
Jaqynda oblys ákimi Berik Ýálı jańa «Smart City» shaǵyn aýdanyna baryp, stadıonnyń qurylys barysymen tanysty. Qadasyn qaqty.
«Stadıonnyń qurylys jumysy bastaldy. Osy jumysty báseńdetpeı, jalǵastyrý qajet. Qarjysy kezeń-kezeńimen bólinetin bolady. Bul – semeılikterdiń kópten kútken jańalyǵy. Semeı – qazaq fýtbolynyń otany. Qala turǵyndary fýtboldy jaqsy kóredi. Sol sebepti de osyndaı stadıon kerek. Kópten beri aıtylyp júr. Nysan ázirge Astana, Almaty, Aqtóbeden keıingi syıymdylyǵy jaǵynan qurylysy josparlanǵan stadıondardyń arasynda tórtinshi oryn alady. ÝEFA-nyń matchtaryn qabyldaýǵa múmkindik týady, olardyń standartyna saı keledi. Bul jańa shaǵyn aýdanda áli de kóptegen nysan boı kóteredi. Jaqyn arada mańǵystaýlyqtar alǵash bolyp qorshaý qoıyp, jumystaryn bastaıyn dep otyr. Eń bastysy, Úkimet tarapynan kelisim bar. Qujattar rásimdelgennen keıin jumys bastalady», dedi óńir basshysy.
Oblys ákimdigi baspasóz qyzmetiniń málimetinshe, «Týǵan jerge týyńdy tik» ınvestısııalyq forýmy aıasynda Semeı qalasy ákimdigi men «KAZ Minerals» toby arasynda memorandým jasalyp, 25 myń kórermenge arnalǵan stadıon salý josparlanǵan. Sonymen qatar atalǵan kompanııa «Elimaı» fýtbol klýbyna jan-jaqty demeýshilik jasap keledi. Stadıonnyń jalpy aýmaǵy – 20 gektar. Qazirgi ýaqytta 25 myń oryndyq stadıonnyń qurylysyn júrgizetin merdiger uıymmen úshjaqty kelisimshart jasalyp, aýmaq qorshalyp, jerdi qazý, tegisteý jumysy bastaldy.
Jobaǵa sáıkes, aýmaqta asfalt joldar men alańdar qarastyrylǵan. Arhıtektýralyq-josparlaý, ınjenerlik-qurylymdyq sheshimderdi ázirleý barysynda aımaqtyń tabıǵı-klımattyq, geologııalyq erekshelikteri tolyq eskerildi. Stadıon qurylysy eki jyl shamasynda salynyp bitedi.
«Qazirgi qazaq fýtbolyna eń keregi – ınfraqurylym. Jańa stadıondar salyp, balalarǵa sapaly akademııalar uıymdastyrylýy kerek. 30 jyldan astam bul jumys sóz kúıinde qalyp keldi. Prezıdent tapsyrmasynyń arqasynda keıingi kezderi ilgerileý baıqalady. Semeıde áý basta stadıon 10 myń oryndyq bolady delingen. Biraq jańa ákim Berik Ýálıdiń bastamasymen syıymdylyǵy 25 myńǵa ulǵaıtyldy. Bul – óte durys bastama. Ákim qazaq fýtbolynyń otany sanalatyn óńir halqynyń ala dopqa degen qyzyǵýshylyǵy joǵary ekenin jaqsy baıqap otyr. «Elimaı» degen at maǵan qatty unaıdy. Qazaqtyń komandasy ekenin birden baıqatady. Endi komanda atyna saı bolyp, eýrokýbokta sátti óner kórsetse deımin. Stadıon qurylysy ýaqytynda aıaqtalyp, jankúıerlerdiń kózqýanyshyna aınalady dep úmittenemin», deıdi fýtbol sarapshysy Bek Tóleýov.
Onyń aıtýynsha, «Elimaı» klýbynyń bıylǵy maýsymdaǵy oıynyn ekige bólip qaraýǵa bolady. Komanda tamyzǵa deıin ala-qula oınady. Sosyn Ǵalymjan Kenjebek, Ramazan Orazov syndy ulttyq qurama úzdikteri kelip, eńse tiktedi. Kúzge qaraı «Aqtóbeden» ozyp, eýrokýbokqa joldama aldy. Iаǵnı «Elimaıdyń» bıylǵy maýsymdaǵy nátıjesine 4 degen baǵa qoıýýǵa bolady. Kelesi jylǵy jaýapkershiligi eki ese. Klýb ishki chempıonatta júldege talasýy kerek. Sosyn eýrokýbokta joǵary nátıjege umtylýǵa tıis. Eger osy eki tapsyrmanyń birde-bireýi oryndalmasa, komanda basshylyǵy, bapkeri qyzmetinen ketkeni durys.
Bıyl elimizdiń Premer-lıgasynda «Elimaı» klýby maýsymdy jaqsy nátıjemen aıaqtady. Komanda 26 oıynnyń 14-de jeńip, 6 oıynda teń túsip, 6 oıynda jeńilis taýyp, týrnır kestesinde 4 orynǵa taban tiredi. Erekshe aıtar jaıt, 25-týrda «Turandy» 6:3 esebimen jeńdi. Sol jeńis «Elimaıǵa» Eýropa joldamasyna – UEFA konferensııalar lıgasy irikteý kezeńine qatysý múmkindigin syılady. Osylaısha, «Elimaı» klýby tarıhı nátıjege qol jetkizdi. Sóıtip klýb alǵashqy ret eýrokýbokqa joldama alyp otyr. Jalpy, 2025 jyl klýbtyń alǵa umtylysyn aıqyn kórsetti. Semeı fýtbolynyń abyroıyn asqaqtatyp, jankúıerlerine kóptegen jeńis syılady. Sol turǵyda jańa stadıon «Elimaı» fýtbolshylarynyń yntasyn arttyryp, jigerin janı túsedi dep senemiz.
Abaı oblysy
