Foto: Ashyq derekkóz
KAZENERGY qaýymdastyǵy keńesiniń 44-otyrysy aıasynda jaǵdaıǵa túsinikteme bergen mınıstr KTK kóleminiń tym aýqymdy ekenin, sondyqtan qoldanystaǵy marshrýttardyń ony tolyq almastyra almaıtynyn erekshe atap ótti.
«Búgingi tańda KTK-nyń balamasy joq, muny moıyndaýymyz qajet. Onyń ótkizý qabileti – 65 mln tonna. Bul kólemdi basqa baǵyttar qamtamasyz ete almaıdy», dedi Erlan Aqkenjenov.
Mınıstr balama retinde jumys isteı alatyn «Baký-Tbılısı-Djeıhan» baǵytyn atady. Sondaı-aq «Atyraý-Samara» baǵyty arqyly Qara teńiz ben Baltyq teńizi porttaryna jetkizýge bolady. Alaıda ol KTK-daǵy zaqymdanǵan jabdyqty qalpyna keltirilgenge deıin naqty qansha kólemdi qaıta baǵyttaýǵa bolatynyn naqtylaǵan joq.
Keńeste sońǵy shabýyldardan keıin ınfraqurylym qaýipsizdigi máselesi kóterildi. Erlan Aqkenjenov vedomstvo saıası baǵa berýden ádeıi tartynatynyn, mundaı túsiniktemelerdi syrtqy saıasat organdarynan alý qajettigin aıtty.
«Mundaı túsindirme alý úshin syrtqy saıası vedomstvoǵa júginý qajet», dedi ol.
Sonymen qatar mınıstr konsorsıým sharttarynda jaýapkershilik shekaralary naqty kórsetilgenin eske saldy.
«Qubyr qaı eldiń aýmaǵy arqyly ótse, sol el onyń qaýipsizdigine jaýap beredi. О́zge elderge qatysty men pikir aıta almaımyn», dedi ol.
Eske sala keteıik, 2025 jylǵy 29 qarashada, Astana ýaqytymen 06:00-de Novorossıısk qalasynda ornalasqan port aýdanyndaǵy teńiz ınfraqurylymyna ushqyshsyz qurylǵylar shabýyldaǵan. Saldarynan aılaqtaǵy ATQ-2 qondyrǵysy isten shyǵyp qaldy. Agregat tolyq jóndeý-qalpyna keltirý jumystary aıaqtalǵanǵa deıin isten shyǵaryldy.
Sonymen qatar kúni keshe Syrtqy ister mınıstri Ermek Kósherbaev Qazaqstan Kaspıı qubyr konsorsıýmyna (KTK) jasalǵan shabýyldardy Ýkraına tarapymen talqylaǵan edi.
