Foto: Ashyq derekkóz
Endi qoldanýshylar ChatGPT ınterfeısinde-aq resept tańdaýdan bastap, azyq-túlik tizimin qurastyryp, tapsyrysty rásimdeýge deıingi barlyq áreketti oryndaı alady.
Kompanııalar buryn da áriptestik ornatqan: eki jyl buryn Instacart óz qosymshasyna ChatGPT negizindegi izdeý júıesin engizgen bolatyn. Sol arqyly paıdalanýshylar keshki asqa ne daıyndaý kerek ekenin nemese dıetaǵa saı mázir tańdaýdy suraı alatyn edi.
Integrasııanyń odan ári kúsheıýine Instacart-tyń burynǵy bas dırektory Fıdjı Sımonyń OpenAI-ǵa aýysýy áser etti. Ol bıyl mamyrda kompanııanyń sıfrlyq ónimder baǵytyn basqarýǵa kirisken.
OpenAI úshin bul — qarapaıym eksperıment emes, strategııalyq baǵyt. Kompanııa jańa modelge bet burdy: jasandy ıntellekt endi tek keńes berip qana qoımaıdy, paıdalanýshy úshin naqty áreketter jasaıdy, taýarlardy izdeıdi, salystyrady jáne tapsyrysty avtomatty túrde rásimdeıdi.
Osyǵan deıin OpenAI ChatGPT-di Booking.com, Canva, Coursera sııaqty servıstermen biriktirgen. Keıin Target, Intuit jáne basqa da iri kompanııalarmen seriktestik ornatyldy.
Merekelik maýsym qarsańynda OpenAI jáne Perplexity qoldanýshylarǵa tikeleı qosymsha ishinde taýar tańdaý múmkindigin keńeıtti. Mysaly, ChatGPT-den berilgen bıýdjet pen parametrlerge saı eń jaqsy noýtbýkty tabýdy suraýǵa bolady. Adobe sarapshylary JI-kómekti onlaın-shopıng kólemi osy qysta 520% ósedi dep boljap otyr.
Jańa saýda ıntegrasııalary kompanııaǵa áleýetti tabys kózin ashady: ChatGPT arqyly rásimdelgen ár satyp alýdan OpenAI shaǵyn komıssııa alady. Alaıda sarapshylardyń pikirinshe, kompanııa shyǵyndarynyń kólemin eskersek, bul komıssııalar qarjylyq balansyna aıtarlyqtaı áser etýi úshin tranzaksııalar sany óte kóp bolýy tıis.
