Foto: Astana ákimdigi
Atalǵan is-sharany Astana qalasy prokýratýrasy, qala ákimdigi, qylmystyq-atqarý júıesi departamenti birlesip uıymdastyrǵan.
«Búgin biz «Zań jáne tártip» tujyrymdamasy aıasynda mańyzdy áleýmettik aksııa ótkizip otyrmyz. Bizdiń ortaq maqsatymyz – esepte turǵan azamattarǵa naqty qoldaý kórsetip, olardyń zańǵa baǵynatyn ári turaqty ómirge qaıta oralýyna jaǵdaı jasaý. Jumyspen qamtylǵan azamattar qaıta quqyq buzýshylyq áreketterge barmasy anyq. Sondyqtan búgin bir alańda bıznes ókilderi men jumyspen qamtý qyzmeti jınalyp, jumys oryndaryn, tegin oqytý múmkindikterin jáne kásibı keńester usynýǵa daıyn. Árbir qatysýshyǵa óz taǵdyryn ózgertýge múmkindik berilip otyr. Sondaı-aq qarjylyq máseleler men nesıelik júktemesine erekshe kóńil bólinýde. Zańgerler men sot oryndaýshylar azamattarǵa bereshekterin retteýge jáne kúrdeli jaǵdaılardy zańdy jolmen sheshýge kómektesedi. Sonymen qatar medısınalyq blok jumys istep tur. Munda qatysýshylar qajetti keńes alady. Budan bólek elektrondyq úkimet portalynda tirkelý jáne memlekettik qyzmetterdi, onyń ishinde qujattandyrý máselesi boıynsha qyzmetterdi HQKO-ǵa barmaı-aq alý múmkindigi de qamtamasyz etilgen», dedi Astana qalasy prokýratýrasy basqarmasynyń aǵa prokýrory Nurtas Dúısembaev.
Onyń aıtýynsha, atalǵan aksııaǵa 200-ge jýyq adam qatysady dep josparlanyp otyr.
«Bul aksııa prokýratýramen memlekettik organdar júrgizip otyrǵan júıeli jumystyń bir bóligi. Biz «Zań jáne tártip» ár azamattan bastalatynyna senemiz. Al bizdiń mindet - adamnyń jańa bolashaqqa nyq qadam jasaýyna múmkindik beretin jaǵdaı jasaý», dedi aǵa prokýror.
Prokýratýra ókiliniń aıtýynsha, qazirgi tańda Astanada 2500-den astam adam probasııa qyzmetinde esepte tur. Olardyń kópshiligi - 25-35 jas aralyǵyndaǵy azamattar.
«Búgingi áleýmettik aksııaǵa 25 jumys berýshi qatysyp jatyr. Olar 300-ge jýyq bos jumys ornyn usynyp otyr. Olardyń qatarynda santehnık, tiginshi, elektrık sekildi jáne t.b. jumystar bar», dedi Astana qalasy ákimdigi Eńbek mobıldiligi ortalyǵynyń dırektory Oljas Omar.
