Foto: Tengrinews.kz
Ýaqyt normasyn ár óńirdiń jergilikti atqarýshy organdary – oblys, respýblıkalyq mańyzy bar qala jáne Astana ákimdikteri jeke aıqyndaıtyn bolady.
Tyıym elektromobılderge, sondaı-aq arnaıy jaryq jáne dybys sıgnaldary bar qyzmet kólikterine qoldanylmaıdy.
Depýtattardyń aıtýynsha, bul sheshim birneshe qys boıy talqylanyp kelgen «Aýla ishinde avtokólikti qansha mınýt qyzdyrýǵa bolady?» degen suraqqa jergilikti deńgeıde jaýap berý úshin qabyldanyp otyr. Bul tıimdi tásil, óıtkeni eldiń ár óńirindegi klımat pen ekologııalyq jaǵdaı ártúrli, al biryńǵaı normany engizý qıyn. Onyń ústine qajet bolǵan jaǵdaıda jergilikti erejelerdi ózgertý zańǵa qaıta túzetý engizgennen jeńilirek.
Sondaı-aq osy túzetýler aıasynda aqyly kommýnaldyq avtoturaqtarǵa tek Astana men Almatyda ǵana ruqsat berý usynylady. «Jol júrý týraly» zańnan «respýblıkalyq mańyzy bar qalalar» týraly norma alynyp tastalady. Aqyly turaq úshin tólem jasamaý faktileri boıynsha aıyppul da tek osy eki qalada ǵana qarastyrylady. Bul úshin Ákimshilik kodekske ózgeris engizý josparlanǵan.
Qujat Senatqa joldanyp, odan keıin Prezıdenttiń qaraýyna jiberiledi. Túzetýler qabyldanyp, resmı jarııalanǵan soń alty aı ótkennen keıin kúshine enedi. Demek, bıylǵy qysta avtokólikti qyzdyrý máselesi burynǵy qoldanystaǵy erejelermen retteledi.
