«Mindetti áleýmettik medısınalyq saqtandyrý qory» Shymkent qalalyq fılıalynyń málimetinshe, bıyl 245 myńnan astam kemshilik anyqtalyp, medısınalyq uıymdarǵa 1,1 mlrd teńge kóleminde aıyppul salynǵan.
«Kemshilikterdiń basym bóligi konsýltasııalyq-dıagnostıkalyq qyzmet kórsetý kezinde tirkelgen. Sonymen qatar qyzmet sapasyna qatysty 300-den astam aryz-shaǵym túsken. Onyń 148-i negizsiz bolǵandyqtan, naýqastardyń ózderi shaǵymyn qaıtaryp alǵan. Olardyń kóbi medısınalyq qyzmet kórsetýden bas tartý, qyzmet sapasynyń tómendigi jáne dári-dármektiń ýaqytyly berilmeýi sııaqty máselelerge qatysty», delingen vedomstvonyń aqparatynda.
Jalpy búginde qalada 177 medısınalyq uıym halyqqa qyzmet kórsetedi. Onyń 34-i — memlekettik, 143-i — jekemenshik klınıka jáne 43 stomatologııalyq qyzmet kórsetý mekemesi bar.
«Mindetti áleýmettik medısınalyq saqtandyrý qory» Shymkent qalalyq fılıalynyń málimetine súıensek, Shymkentte 1 mln astam adam, ıaǵnı halyqtyń 81,7 paıyzy saqtandyrylǵan. Onyń ishinde jeńildik sanatyndaǵy 800 myńǵa jýyq azamattyń jarnasyn memleket tólep keledi. 232 myń adam saqtandyrylmaǵan. Alaıda qalada MÁMS júıesine qatyspaıtyn 55 362 osal sanattaǵy azamat bar.
