Foto: Mádenıet jáne aqparat mınıstrligi
Qoıylym teatrdyń birneshe shyǵarmashylyq baǵytyn bir sahnada toǵystyrdy. Drama, balet jáne vokaldyq trýppalardyń birlesken jumysy arqyly kórermenge batyrdyń taǵdyry tek áskerı erlik turǵysynan ǵana emes, ulttyq rýh, ishki tártip pen týǵan jerge adaldyq uǵymdary arqyly ashylady. Spektaklde Baýyrjan Momyshulynyń rýhanı bolmysyna, til men dástúrge, dala mádenıetine baılanysyna erekshe nazar aýdarylǵan.
Sahnalyq sheshim eki kezeńdi qatar beıneleýge qurylǵan. Qazirgi zaman keıipkerleri Nýrık pen Ásem batyr eskertkishi janynda jańa medıa formaty arqyly ótkenge kóz júgirtedi. Sıfrlyq keńistik bir sátte maıdan shyndyǵyna ulasyp, Uly Otan soǵysy jyldaryndaǵy erliktiń mánin jańasha túsinýge jeteleıdi.
Spektakl sońynda urpaqtar sabaqtastyǵy ıdeıasyn alǵa tartady. Erlik týraly estelik ótkenge qurmet qana emes, bolashaq aldyndaǵy jaýapkershilik retinde kórsetiledi. Qoıylym qazaq jáne orys tilderinde sahnalanady.
