Foto: istockphoto.com
«Qazirgi tańda barlyq balalardyń jaǵdaıy turaqtandy. Reanımasııada jatqan eki bala profıldi toksıkologııalyq bólimge aýystyryldy. Qazir olardyń ómirine qaýip joq», dedi Almaty qalasyndaǵy Balalar shuǵyl medısınalyq járdem ortalyǵynyń bas dárigeriniń orynbasary Qurmetbek Tohtaruly.
Esterińizge sala keteıik, 11 jeltoqsanda Almaty-2 temirjol beketinde tabıǵı gazdan ýlaný deregi tirkelip, barlyǵy 52 adamǵa medısınalyq kómek kórsetildi.
Kýágerlerdiń aıtýynsha, oqıǵaǵa gazben jumys isteıtin jylytqyshtan týyndaǵan aqaý sebep bolǵan. Adamdar sýyqtan jylyný úshin jylytqyshtyń janyna jınalǵan, biraq qysqa ýaqyt ishinde olardyń jaǵdaıy kúrt nasharlaǵan.
«Bir sátte bir bala esinen tanyp, aıqaılady. Men de ózimdi jaman sezindim. Basynda basym aınalyp, esimdi birden jınaı almadym. Biz poıyzdan shyqqannan keıin de álsizdik sezildi», dedi Roman Muratov.
Qazir balalar men eresekterge medısınalyq kómek kórsetilip, zardap shekkenderdiń jaǵdaıy baqylaýǵa alynǵan. Barlyq jaǵdaıdy tıisti organdar jan-jaqty tekserip jatyr.
