Foto: Úkimet
Ol Memleket basshysynyń ınfraqurylymdy jańǵyrtý boıynsha qoıǵan mindetterin júzege asyrý tutynýshylardy gazben jabdyqtaý qyzmetterimen qamtýdy arttyrýǵa múmkindik bergenin aıtty.
«Halyqty gazben qamtý boıynsha Memleket basshysy tapsyrǵan áleýmettik mindetter júıeli túrde sheshilip jatyr. Tabıǵı gaz shalǵaı óńirlerdiń turǵyndary úshin qoljetimdi ıgilikke aınalyp, eldegi gazben qamtý deńgeıi 64,2%-ǵa jetti. 2025 jyly 95 eldi mekende 350 myń adam gazben qamtamasyz etildi. Bul maqsattarǵa 112 mlrd teńgeden astam qarjy bólindi», dep atap ótti Erlan Aqkenjenov.
Jumystar geografııasy Qazaqstannyń barlyq aımaǵyn qamtydy. Aqmola oblysynda 100 myńnan astam turǵyn turatyn Qosshy qalasy men Talapker aýyly gazben qamtyldy. Astanada gazben qamtý deńgeıi shamamen 97%-ǵa jetip, iri turǵyn alaptary qosyldy. Jyl sońyna deıin Úrker shaǵyn aýdanynda gaz jelilerin tartý jumystary tolyq aıaqtalady.
Ońtústik óńirlerdi damytý jónindegi tapsyrmalardy oryndaý boıynsha Túrkistan oblysynda 100 myń turǵyn gazben qamtý aıasynda quny 10 mlrd teńgeden astam jobalar júzege asyryldy. Jetisý oblysynda uzyndyǵy 300 shaqyrym «Taldyqorǵan – Úsharal» magıstraldy gaz qubyry paıdalanýǵa berildi. Jambyl oblysynda da gaz qubyrlaryn júrgizý jumystary belsendi júrgizilýde.
Batys Qazaqstan oblysynda «Rostoshı – Taıpaq» joǵary qysymdy gaz qubyrynyń qurylysy bastaldy, bul Aqjaıyq jáne Terekti aýdandarynyń jyldar boıǵy gaz tapshylyǵyn sheshýge múmkindik beredi.
