Foto: Oblys ákimdigi
О́ńirdiń damýyna serpin beredi
Joba «Zhanatas Chemical Complex» JShS tarapynan júzege asyrylady. Bul Qazaqstandaǵy hımııa ónerkásibiniń jetekshisi sanalatyn «Kazfosfat» kompanııasyna enshiles qurylym. Álemdik standarttarǵa saı tyńaıtqysh óndirý úshin TMD elderinde balamasy joq kendi tereń baıytý tehnologııasy engiziledi. Bul tehnologııa Qarataý basseınindegi fosforıttik qospalar mólsheriniń joǵary bolýy sekildi máseleni sheshýge múmkindik beredi.
Oblys ákimdiginiń málimetinshe, jobany iske asyrý – óńir úshin áleýmettik-ekonomıkalyq damýǵa serpin beredi. Jańa 1200 joǵary bilikti jumys oryndaryn qurý kózdelip otyr. Kadrlardy daıarlaý úshin kompanııanyń halyqaralyq áriptesteri ázirlegen oqytý júıesi, taǵylymdamalar men biliktilikti arttyrý baǵdarlamalary uıymdastyrylatyn bolady.
«Jańa keshen Qazaqstandaǵy iri hımııalyq óndiristiń jańa býynyna aınalady. Jahandyq naryqta eldi mıneraldy tyńaıtqyshtardy senimdi óndirýshi jáne eksporttaýshy retinde rólin nyǵaıtady», dedi «Zhanatas Chemical Complex» bas dırektory Erjan Mýkanov.
Investısııa 300 mlrd teńgeden asady
Keshenniń jobasy ázirlenip jatyr. Shıkizattyń negizgi kózi retinde «Qystas» ken ornyn jiti barlaý isi aıaqtaldy. Gaz tartyp, elektrmen jabdyqtaýǵa tehnıkalyq sharttar tolyq alynǵan. Zaýytty sýmen jabdyqtaý úshin «Aqjar» jerasty sýlary ken ornyn barlaý jáne dala jumystary júrgizilip jatyr. Burǵylaý isi jáne synamaly sý sorý jumystary aıaqtalǵan. Sonymen qatar halyqaralyq EPC-merdigerlerimen kelissózder júrgizilip jatyr. Qurylys-montajdaý isin bastaý 2026 jyldyń sońynda josparlanǵan.
Jobaǵa salynatyn jalpy ınvestısııa kólemi 300 mlrd teńgeden asady. Qarjylandyrý tetigi retinde «Qazaqstan Damý Banki» men ózge de kózderden qarajat tartý múmkindigi qarastyrylyp jatyr.
Jańatas qalasyndaǵy keshen – shıkizatty qaıta óńdeýdiń tolyq sıklin qamtamasyz etetin ári ıntegrasııalanǵan óndiristik tizbek qaǵıdaty boıynsha salynady. Onyń qyzmeti zamanaýı aýa tazartý júıesi men eń ozyq tehnologııalardy paıdalaný nátıjesinde halyqaralyq ekologııalyq standarttarǵa tolyq sáıkestendiriledi.
