Jeke jetistikter men turaqtylyq jyly
«2025 jyl siz úshin qandaı jyl boldy?» degen alǵashqy suraqqa respondentterdiń birazy oılanyp jaýap bergen. Bul kúndelikti ómirdiń qarqyny aıasynda jyldyń tek syn-qaterlermen ǵana emes, sonymen qatar jetistiktermen de sıpattalatynyn árdaıym birden ańǵarý múmkin emestigin aıǵaqtaıdy. Sonymen qatar, saýalnama qorytyndylary oń baǵalardyń teris pikirlerden 3,5 ese basym ekenin kórsetti. Atap aıtqanda, respondentterdiń tek 11%-y 2025 jyldy sátsiz dep baǵalasa, 37%-y ony tabysty jyl retinde ataǵan. Respondentterdiń basym bóligi (52%) jyldy aıqyn oń nemese teris úrdisterdiń basymdyǵy baıqalmaǵan, jalpy turaqty kezeń retinde sıpattaǵan.
2025 jylǵy jetistikter týraly sóz qozǵaǵanda, qazaqstandyqtar eń aldymen sport, tehnologııalar men sıfrlandyrý, kınoındýstrııany damytý, ónerkásip, sondaı-aq mektepter, aýrýhanalar jáne ózge de áleýmettik nysandardyń salynýy sııaqty salalardy atap ótken.
Al respondentterge 2025 jyldyń eń jarqyn ári jaǵymdy oqıǵalaryn ataý usynylǵanda, eń kóp atalǵandary mynalar boldy:
- «Qaırat» – «Real Madrıd» arasyndaǵy tarıhı match jáne sportshylarymyzdyń ózge de jetistikteri,
- Álemdik juldyzdardyń konsertteri (J Lo, Backstreet Boys) jáne túrli mereıtoılyq sharalardy atap ótý (Abaıdyń 180 jyldyǵy, Jeńistiń 80 jyldyǵy, Konstıtýsııanyń 30 jyldyǵy jáne basqalary),
- Jańa mektepter men aýrýhanalardyń ashylýy, ınfraqurylymdy jaqsartý (joldar, qalalyq abattandyrý jáne t.b.),
- Jasandy ıntellekt salasyndaǵy iri jetistikter (Alem.ai, sýperkompıýter, Higgsfield AI),
- Prezıdenttiń halyqaralyq deńgeıdegi kezdesýleri (Donald Tramp, Sı Szınpın jáne t.b.).
Saýalnama qorytyndysy oń oqıǵalar eldiń bilim berý, densaýlyq saqtaý, ekologııa jáne tehnologııalar sııaqty negizgi salalarynda da bar ekenin kórsetedi.
Osy turǵyda eldiń damý baǵytyn qoldaý zertteý nátıjelerindegi naqty derektermen de rastalady:
El azamattarynyń 71%-y eldiń durys baǵytta damyp kele jatqanyn atap ótti. Bul derek jyldaǵy oqıǵalardy kópshiliktiń eldiń turaqty damýy men memlekettik saıasattyń turaqtylyǵymen baılanystyratynyn baıqatty.
Qazaqstan halqynyń 77%-y Prezıdenttiń qyzmetin qoldaıtynyn bildirdi. Qoldaýdyń osyndaı joǵary deńgeıi Prezıdentti eldiń damýynyń durys baǵytyn aıqyndaıtyn kóshbasshy retinde qabyldaıtynyn kórsetedi.
Eldiń damý baǵytyna degen senimdilik pen Prezıdentke berilgen joǵary qoldaý qoǵamda Qazaqstannyń aldaǵy damý baǵyty jóninde birtutas kózqarastyń qalyptasqanyn aıqyndaıdy.
