Foto: inform.kz
Memleket basshysy bastamashy bolǵan aýqymdy reformalardy esepti kezeńde Úkimet iske asyrýdy jalǵastyrdy. Bul reformalar munaı-gaz sektoryn, janar-jaǵarmaı materıaldary naryǵyn jáne munaı óńdeý salasyn qamtıdy.
Munaı-gaz salasyndaǵy jyldyń basty oqıǵasy – Teńiz ken ornyndaǵy Bolashaq keńeıtý jobasynyń tolyq aıaqtalýy boldy. Úshinshi býyn zaýytynyń iske qosylýy munaı óndirý kólemin jylyna 12 mln tonnaǵa arttyryp, eksporttyq túsimniń turaqty kózin qalyptastyrýǵa jáne ulttyq ekonomıkanyń áleýetin kúsheıtýge múmkindik berdi.
Ishki janarmaı maılaý materıaldar (JMM) naryǵyn retteý salasynda baǵany qolmen basqarýdan naryqtyq tetikterge kóshý júzege asyryldy. Qabyldanǵan sharalar naryqty turaqtandyryp, otynmen tolyq qamtamasyz etýge jáne tapshylyq qaýpin barynsha azaıtýǵa jol ashty.
«2025 jyly munaı óńdeý salasyn 2040 jylǵa deıin damytýǵa arnalǵan uzaqmerzimdi óndiristik baǵdarlar bekitildi. Olar qýattardy ulǵaıtý, ónim sapasyn arttyrý jáne ǵylymı-tehnologııalyq sheshimderdi engizý qaǵıdattaryna negizdelgen. Nysanaly kórsetkish munaı óńdeý kólemin jylyna 18 mln tonnadan 39 mln tonnaǵa deıin jetkizýdi kózdeıdi. Bul qoldanystaǵy munaı óńdeý zaýyttaryn (MО́Z) keńeıtý jáne qýaty jylyna 10 mln tonnaǵa deıingi jańa MО́Z jobasyn iske asyrý esebinen qamtamasyz etiledi», dep atap ótti Erlan Aqkenjenov.
Bıyl CaspiBitum zaýytyn jańǵyrtý aıaqtaldy. Nátıjesinde kásiporynnyń qýaty jylyna 1,5 mln tonna munaıǵa deıin, al bıtým óndirisi jylyna 750 myń tonnaǵa deıin ulǵaıdy.
Shymkent, Atyraý, Pavlodar munaı óńdeý zaýyttaryn keńeıtý, sondaı-aq jańa MО́Z salý úshin áleýetti ınvestorlardy tartý jumystary jalǵasyp jatyr.
Salanyń ekologııalyq kún tártibi men tehnologııalyq damýyna erekshe kóńil bólinip otyr. Kómirtekti beıtaraptyq strategııasy aıasynda K5+ ekologııalyq standartyndaǵy munaı ónimderine kóshý bekitildi. Munaı óńdeý zaýyttaryn tehnıkalyq jańǵyrtý munaıdy óńdeý tereńdigin 94%-ǵa deıin arttyrýǵa jáne joǵary qosylǵan quny bar ónimder shyǵarý úshin munaı óńdeýdi munaı-hımııamen yqpaldastyrýǵa múmkindik beredi.
