Iá, 1925 jyl – qazaq óneriniń tarıhyndaǵy uly betburys kezeń. Búkilálemdik jármeńkeniń sahnasyna dombyra kúmbirimen qatar kóterilgen Ámire Qashaýbaevtyń qaıtalanbas úni Eýropa tyńdarmanyn ǵana emes, búkil álemdi tańdaı qaqtyrǵan edi. Onyń shyrqaǵan «Balqadıshasy», «Aǵash aıaq», «Úsh dosy» men san túrli halyq áýeni – qazaq dalasynyń tákappar minezin, keń júregin, ulanǵaıyr rýhyn áıgiledi. Endi, mine, sol tarıhı sáttiń qurmetine uıymdastyrylatyn kesh – tulǵa taǵylymyn ulyqtaýdyń aıqyn úlgisi.
«Án atasy – Ámire» mýzykalyq keshi – tek konsert emes, kórkem qoıylymǵa aınalǵan teatrlyq týyndy. Kórermen Ámireniń ómir jolynan syr sherter sahnalyq kórinisterdi tamashalap, ánshiniń tulǵalyq tabıǵaty men zaman tynysyn sezindi. Zamanaýı mýzykalyq óńdeýler men dástúrli naqysh bir sahnada toǵysyp, qazaq rýhanııatynyń úzilmes sabaqtastyǵyn kórsetti.
«Halyq qazynasy» ulttyq óner ortalyǵynyń ártisteri kórermen nazaryna dástúr men zamanaýı sahna óneri úılesim tapqan mazmundy konsert usyndy. Atap aıtsaq, kesh baǵdarlamasyna «Qulager», «Qarqaraly», «Dýdaraı», «Balqadısha» syndy halqymyzdyń júreginde saqtalǵan ándermen qatar Táttimbet, Qurmanǵazy, Qazanǵap kúıleri engizilgen. Ulttyq mýzykaǵa tán qaıtalanbas ún, dombyranyń tereń kúmbiri men dástúrli vokaldyń asqaq áýeni kórermendi bir sátte ǵasyrlar arnasyna tartyp áketkedeı áser syılady.
Ánshi rýhy asqaqtaǵan aıtýly keshte Qazaqstannyń eńbek sińirgen qaıratkerleri – Qumarbek Qalqataı, Erlan Rysqalı, Erbolat Shaldybekov, Aıgúl Elshibaeva, Ardaq Balajanova, Nurbolat Arzamasuly, Qaırat Aıtbaev, Elmura Jańabergen syndy maıtalmandar Ámire salǵan án mektebiniń bıik úlgisin áıgiledi. Sonymen qatar sahna tórinde óner kórsetken «Daryn» Memlekettik jastar syılyǵynyń laýreattary – Asqar Muqııat, Perızat Turarova, Kúnsulý Túrikpen, Aıaýlym Qamajan, ulttyq jáne halyqaralyq baıqaýlardyń júldegerleri Edil Basyǵara, Álıhan Dúısenbaı, Baýyrjan Muhametbaı, Venera Tabys, Aqerke Tájibaeva, Dárııa Bekpenbet bastaǵan ónerli jastar da taǵylymdy keshtiń kórkin qyzdyrdy. Bir sahnada túrli býyn, túrli mektep, túrli oryndaýshynyń bas qosýy – ulttyq ónerdiń úzilmes jalǵastyǵynyń aıǵaǵy.
«Án atasy – Ámire» – búgingi urpaqtyń keshegini qurmetteýine, ónerdiń uly mektebine taǵzym etýine arnalǵan kesh. Bul – ulttyq sanany serpiltetin, tamyrymyzdy tanytatyn, halyq ániniń bıik bolmysyn dáripteıtin rýhanı mereke. Qazaq ánin alǵash ret álemdik deńgeıde moıyndatqan Ámire Qashaýbaevtyń óneri – tek tarıh emes, búgingi kúnniń de tynysy. Elorda tórindegi aıtýly kesh sol asyl ónerdiń qaıta jańǵyrýyna, jas urpaqtyń júreginde ulttyq áýenniń máńgi qalýyna úles qosqany sózsiz.
