Ult ustazy sezge bara aldy ma, bara almady ma, ol jaǵy beımálim. Birneshe ǵalymnan surap kórip edik, ol kisiler de bilmeıtin bolyp shyqty. Anyǵy sol, mýzeıde jatqan shaqyrtý hat Aqańnyń jıyrmasynshy jyldardan keıingi kezeńde jańasha sıpatta kúsh ala túsken halyq aǵartý isi men pedagogıka salasynda bútin túrki jurtyna qadiri asqan dara ǵalym bolǵanyn taǵy bir aıqyndaı túsedi.
Sol kezdegi Qara-Qyrǵyz avtonomdyq oblystyń ortalyǵy Pishpekten kelgen shaqyrtý hattyń jyly kórsetilmegen. Biraq jıynnyń 25 mamyrda ótetini jazylǵan. Hat «Qazaqstan. Aqmeshit. Halyq aǵartý komıssary joldas Baıtursynovqa» dep bastalady. Aqańnyń 1920 jyldyń qazan aıynan bastap týra bir jyl Qazaq AKSR-i halyq aǵartý komıssary qyzmetin atqarǵanyn eskersek, shaqyrtý 1922 jyldyń mamyrynda kelgen bolý kerek.
«Bul qujattyń kóshirmesin osydan tórt jyl buryn bizdiń mamandar Ortalyq memlekettik arhıvten alyp keldi. Hat mazmunyna úńilsek, Ahmet Baıtursynuly Qazan, Baký saparyna deıin oqý-aǵartý salasynyń, til biliminiń bilgiri retinde Qyrǵyz Respýblıkasynda ótken úlken jıynǵa shaqyrylǵan. Hatta sezdi uıymdastyrý bıýrosy Ult ustazynyń Qazaqstandaǵy aǵartý salasynyń máselelerin jete biletindigin daralap kórsetip, Aqańnyń bul saladaǵy bilim-tájirıbesi sezd jumysyna kóp septigin tıgizer edi degen emeýrin tanytady. Ahmet Baıtursynuly ómiriniń beımálim betteri áli de kóp. Sondyqtan atalǵan qujat ahmettanýdaǵy jańa bir izdeniske iz salyp, kádege jarap qalýy múmkin», deıdi mýzeıdiń ǵylymı hatshysy Názıma Otasheva.
Qostanaı oblysy
