Bundaı joǵary marapatty dárigerdiń kásibı sheberligi men adam ómirin saqtaýdaǵy erekshe úlesi dáleldeı tústi. Sonyń bir aıqyn mysaly – jaqyn arada Aqkól aýdanynan túsken shuǵyl shaqyrtý. Sanıtarlyq avıasııa arqyly aýyr haldegi bala jetkizildi jáne Elaman Tájenovtiń jedel áreketi arqasynda naýqastyń ómiri saqtaldy.
«Sanıtarlyq avıasııa arqyly aýyr haldegi bala týraly habar tústi. Jedel konsılıým uıymdastyrylyp, aldyn ala dıagnoz qoıyldy — aýyr aǵymdy menıngıt, serebraldy asqynýmen. Alǵashqy shuǵyl kómek kórsetilip, balanyń jaǵdaıy turaqtandyrylǵannan keıin Kókshetaý qalasyndaǵy oblystyq balalar aýrýhanasyna jetkizildi», deıdi dáriger.
Elaman Tájenov medısına jolyn sanaly túrde tańdaǵan maman. Rezıdentýrany Almatydaǵy Mediterra halyqaralyq klınıkasynyń klınıkalyq bazasynda ótken. Oqý barysynda eresektermen de, balalarmen de jumys istegen, biraq tájirıbe kezinde balalarmen jumys isteý oǵan jaqynyraq ekenin túsingen.
«Dıplom alǵan soń Kókshetaý qalalyq emhanasynda eresekter reanımasııa bóliminde qyzmet atqardym. Biraq ýaqyt óte kele balalar medısınasy – meniń shynaıy baǵytym ekenin uqtym», deıdi dáriger.
Jaqynda Elaman Tájenov Qazaqstannyń ár óńirinen jınalǵan 15 dárigermen birge Germanııanyń Mınden qalasyndaǵy klınıkalyq bazada biliktiligin arttyrdy.
«Germanııada eń aldymen naýqas pen dárigerge qolaıly jaǵdaı jasaý aldyńǵy orynǵa qoıylady. Klınıkada bári bir ǵımarat ishinde: medısınalyq forma, demalys aımaǵy, qajetti jabdyq. Bul jumys tıimdiligine tikeleı áser etedi», deıdi ol.
Onyń aıtýynsha, qazaqstandyq medısına shetelden kem túspeıdi. Negizgi erekshelik – uıymdastyrý, logıstıka jáne tehnologııalyq qamtamasyz etý deńgeıi.
Aldaǵy ýaqytta dáriger men áriptesteri balalar aýrýhanasyna ýltradybystyq navıgasııany (ÝZI-navıgasııa) jáne reanımasııalyq kómektiń zamanaýı ádisterin tolyq engizýdi josparlap otyr. Bul ásirese ınvazıvti manıpýlıasııalardyń qaýipsizdigin arttyrýǵa múmkindik beredi.
— Medısınaǵa úlken tabys úshin emes, adamǵa kómegim tısin degen nıetpen kelý kerek. Sonda ǵana bul mamandyqtyń shynaıy mánin túsinesiń, — dep túıindedi Tájenov.
