Foto: Joǵarǵy sot
Aıyptalýshy N.Qazbek qazan aıynda abattandyrý jáne jóndeý jumystaryna jaýapty merdigerden Hromtaý qalasynyń ákimi S.Shabyqbaevqa 400 myń teńge jáne ózine para retinde 1 100 000 teńge aýdarýdy talap etken. Sondaı-aq belgilengen merzimde qarjyny aýdarmasa kúsh qoldanatynyn aıtyp, qorqytqan. Ol osy sıpattaǵy áreketimen jábirlenýshige 700 myń teńge kóleminde shyǵyn keltirgen.
Sot barysynda jábirlenýshi N.Qazbektiń áreketin keshirgenin málimdegen. Sondyqtan oǵan qatysty «Bopsalaý» isi qysqartylyp, aıyptaý «Para alý» deregi boıynsha jalǵasqan.
Qylmystyq isti qaraý barysynda eki aıyptalýshy da kinásin moıyndaǵan. Sot olardy kináli dep tapty. Úkimge saı S.Shabyqbaevqa ómir boıyna memlekettik qyzmette, sot júıesinde jáne jergilikti ózin-ózi basqarý organdarynda laýazymdy qyzmet atqarýǵa tyıym salyndy. Sondaı-aq 12 mıllıon teńge kóleminde aıyppul tóleýge mindetteldi. Qamaýda bolǵan ýaqyty esepke alynyp, túpkilikti aıyppul somasy 11 355 151 teńge boldy.
N. Qazbek te osy kólemde aıyppul arqalady. Onyń da kúzetpen ustaý ýaqyty esepke alynyp, 11 339 424 teńge aıyppul tóleýge mindetteldi.
Aıta keteıik, S.Shabyqbaev Hromtaý qalasynyń ákimi qyzmetine 2023 jyldyń qyrkúıeginde taǵaıyndalǵan bolatyn.
