«ALTAI MAI» ósimdik maıyn óndirýge arnalǵan sońǵy úlgidegi zamanaýı keshen. Munda shıkizatty óńdeýdiń barlyq sıkli qamtylǵan. Máselen ónimdi qabyldaý, ony keptirý, ekstraksııalaý, tazartý jáne qaptaý tolyq avtomattandyrylǵan júıede júrgiziledi. Kásiporyn jergilikti jerde ósiriletin kúnbaǵys pen raps sııaqty maıly daqyldardy óńdep, birneshe túrli ónim shyǵarady. Atap aıtqanda, tazartylǵan jáne tazartylmaǵan ósimdik maıy, kúnjara (shrot), pellet jáne basqa da ónimder. Zaýyttyń sehtary joǵary tehnologııalyq jabdyqtarmen jaraqtalǵan.
«Búgin biz kópten kútken irgeli zaýyttyń ashylýyna jınaldyq. Investorlar bul jobany iske asyrý úshin 23,5 mlrd teńge qarjy quıdy. Jańa zaýyttyń ereksheligi maıly daqyldardy tolyq sıkldi óńdeýden ótkizedi. Qazir munda 280 adam eńbek etedi, aldaǵy ýaqytta 350 adam jumys isteıtin bolady. Eń bastysy bul kásiporyn ekologııa talaptaryna saı ári qaldyqsyz jumys isteıdi», dedi aımaq basshysy Nurymbet Saqtaǵanov.
Mamandardyń aıtýynsha, ónimniń ár partııasy kóp satyly sapa baqylaýynan ótedi. Bul onyń tabıǵı qundylyǵyn saqtaýǵa, halyqaralyq standarttarǵa saı bolýyna múmkindik beredi. Oǵan qosa kásiporynda ekologııaǵa júktemeni azaıtatyn zamanaýı júıeler engizilgen, aıtalyq tıimdi tazartý qurylǵylary, qaýipsiz qaıta óńdeý tehnologııalary jáne qaldyqsyz óndiris sheshimderi qoldanylady.
Jańa zaýyttyń iske qosylýy óndiristik qýatty arttyryp qana qoımaı, búkil agroónerkásip sektoryn damytýǵa tyń serpin beredi deıdi mamandar.
«Táýligine 500 tonna kúnbaǵys maıyn, 120 tonna tazartylǵan maı, 178 tonna syǵymdalǵan maı, 50 tonna ekstraksııaly maı, 200 tonna túıirshikti kúnjara óńdep shyǵaramyz. Saǵatyna 2 myń bótelke maı quıylady. Daıyn ónimder TMD elderinen basqa kórshi Qytaıǵa, Azııa memleketterine eksporttalady. Bolashaqta Eýropaǵa, Arab elderine shyǵarsaq degen josparymyz bar. Qazirdiń ózinde Qytaıdan suranys kóp túsip jatyr. Bizdiń kásiporyn olardyń bárin qamtamasyz etýge daıyn» dedi, «ALTAI MAI» zaýytynyń bas tehnology Dáýlen Beısenbaev.
Zaýyttyń jumysy qaldyqsyz óndiriske baǵyttalǵandyqtan bul jerde maıly daqyldardyń qabyǵyna deıin kádege jaratylady. Máselen, kúnbaǵysty syǵyp, maıyn alǵan soń qabyǵynan otyn daıyndalady. Ony kásiporynnyń bý qazandyǵyna jaǵyp, energııasyn óndiriske paıdalanady.
Zaýyt ókilderiniń aıtýynsha, bul kásiporynnyń ashylýy jańa óndiristi iske qosý ǵana emes, birinshi kezekte ımportty almastyrýǵa, otandyq aýyl sharýashylyǵy óndirýshilerin qoldaýǵa jáne eldiń azyq-túlik táýelsizdigin nyǵaıtýǵa múmkindik beredi.
Shyǵys Qazaqstan oblysy
