Foto: Oqý-aǵartý mınıstrligi
Almatydaǵy Medeý aýdanynda eki bilim berý nysany 140 oryndyq jańa №195-shi balalar bóbekjaı-baqshasy men rekonstrýksııadan ótken №99-shy mekteptiń tehnıkalyq ashylýy ótti. Mektepte hımııa, fızıka jáne bıologııa kabınetteri, sport zaly, beıneleý óneri kabıneti, sondaı-aq 100 oryndyq akt zaly jasaqtalǵan. Oqýshylardyń qaýipsizdigin saqtaý maqsatynda zamanaýı órt qaýipsizdigi júıesi engizilgen, dabyl qurylǵylary ornatylǵan, ǵımarat seısmıkalyq turǵyda kúsheıtilgen.
Al Aqtóbe oblysynyń Jaǵabulaq aýylynda 100 oryndyq zamanaýı balabaqsha ashyldy. Munda úıirmeler men damytý stýdııalary jumys isteıdi, sonyń ishinde 4 jastan bastap robototehnıka, uldarǵa doıby, qyzdarǵa toqý úıirmeleri uıymdastyrylǵan.
Qostanaı oblysynyń Frýnzenskoe aýylynda jańa balabaqsha paıdalanýǵa berildi. Ǵımarat zamanaýı mektepke deıingi bilim standarttaryna tolyq saı keledi. Oblysta 28 myńnan astam balany qamtıtyn 467 mektepke deıingi uıym jumys istep tur.
Shyǵys Qazaqstan oblysynyń Saryóleń aýylynda Baýyrjan Momyshuly atyndaǵy jańa mektep ashyldy. Bilim berý uıymy qazirgi talaptarǵa sáıkes jabdyqtalǵan: hımııa, bıologııa, fızıka, matematıka kabınetteri jáne basqa da pán kabınetteri, shaǵyn ortalyq jumys isteıdi. Oqýshylar úshin ashana, sport jáne akt zaldary qarastyrylǵan.
Al elordada «Keleshek mektepteri» ulttyq jobasy aıasynda №23-shi mekteptiń qurylysy aıaqtaldy. Aıta keteıik, salynǵan jáne salynyp jatqan mektepterdiń basym bóligi Astananyń Esil aýdany men Nurly shaǵynaýdanynda ornalasqan.
Mańǵystaý oblysynyń Jańaózen qalasynda 1200 oqýshyǵa arnalǵan jańa formattaǵy mektep ashyldy. Mektepte 61 oqý kabıneti, sonyń ishinde dızaın jáne tehnologııa, tamaqtaný mádenıeti, kórkem óner, robototehnıka, STEM jáne mýzyka kabınetteri qarastyrylǵan. Qaýipsizdikti qamtamasyz etý úshin 126 beınekamera ornatylǵan. Bul óńirde ulttyq joba aıasynda paıdalanýǵa berilgen 12-shi mektep.
Mınıstrlik málimetinshe, qazir elimizde 192 myń orynǵa arnalǵan 130 mekteptiń qurylysy aıaqtalǵan. Onyń 92-si «Keleshek mektepteri» ulttyq jobasy aıasynda salynǵan, jartysy aýyldyq eldi mekenderde ornalasqan.
Aıta keteıik, 2025–2026 oqý jylynda elimizde 232 bilim berý uıymy salynady.
