Ulttyq ulannyń 5573 áskerı bóliminde qyzmet atqaratyn efreıtor Aleksandr Netesov «Anashym» ánin oryndap, áleýmettik jeli qoldanýshylarynyń zor yqylasyna ıe boldy. TikTok platformasynda jarııalanǵan beınerolıkti júz myńǵa jýyq adam tamashalap, segiz myńnan astam laık pen myńnan asa jyly pikir qaldyrǵan. Kórermender ánniń júrekten shyqqan shynaıy sezimge toly ekenin jazyp, oryndaýshyǵa alǵysyn bildirgen.
Aleksandr Netesov Ulttyq ulannyń Án-bı ansambli Erler horynyń solısi ári konsertmeısteri. Onyń qazaq tilindegi oryndaýyn jeli qoldanýshylary áserli, tabıǵı ári qazaq halqynyń mádenıeti men dástúrine degen tereń qurmettiń kórinisi dep baǵalady. Kópshilik «Anashym» ániniń onyń oryndaýynda erekshe jan tebirenterlik sıpat alǵanyn atap ótti.
Ánshiniń qazaq tiline qyzyǵýshylyǵy bala kezinen qalyptasqan. Ol Reseıdiń Kemerovo qalasynda dúnıege kelip, tórt jasynda anasymen birge onyń týǵan jerine qonys aýdarǵan. Balalyq shaǵy ótken shaǵyn aýylda kúndelikti qarym-qatynas qazaq tilinde órbigen. Sol ortada ósken Aleksandr aınalasyndaǵy adamdarmen bir tilde sóılesýge umtylyp, memlekettik tildi tabıǵı túrde meńgergen.
Búginde qazaq tili onyń shyǵarmashylyq jolynyń ajyramas bóligine aınalǵan. Ulttyq ulan ansambliniń repertýarynda qazaq tilindegi ánder aıryqsha oryn alady. Solardyń biri ujymnyń vızıttik kartochkasyna aınalǵan «Týǵan jer» áni. Bul týyndymen ansambl eldiń joǵary laýazymdy tulǵalary men sheteldik qonaqtar aldynda óner kórsetip, Aqtóbe qalasynda ótken baıqaýda Gran prı ıelengen.
Aleksandr Netesovtyń aıtýynsha, tildi meńgerý halyqtyń bolmysyn, mádenıetin tereń túsinýge jol ashady. Ol kúndelikti ómirde qazaq tilindegi ánderdi, maqal-mátelder men turaqty tirkesterdi jıi qoldanady. Sonymen qatar aǵylshyn tilin de erkin meńgergen áskerı ónerpaz til úırený adamnyń tanym kókjıegin keńeıtetinine senimdi.
Ulttyq ulan sapyndaǵy qyzmeti, mádenıetke degen qurmeti jáne úzdiksiz izdenisi Aleksandr Netesovtyń óner men til arqyly adamdardy jaqyndastyra alatyn tulǵa ekenin aıqyn kórsetedi
