Foto: Jasandy ıntellekt jáne sıfrlyq damý mınıstrligi
Memleket basshysy Qasym-Jomart Toqaevtyń AQSh-qa jasaǵan resmı sapary aıasynda birqatar qujattarǵa qol qoıyldy. Búgin Premer-Mınıstrdiń orynbasary – jasandy ıntellekt jáne sıfrlyq damý mınıstri Jaslan Madıev, Beeline Qazaqstan basshylyǵy jáne SpaceX ókilderi jańa tehnologııanyń múmkindikterin is júzinde kórsetti.
Synaq barysynda Starlink spýtnıktik jelisi men Beeline-nyń jerústi ınfraqurylymy biriktirilip, qarapaıym uıaly telefon arqyly SMS-habarlamalar men messendjer qońyraýlary sátti júzege asyryldy. Direct-to-Cell tehnologııasynyń basty ereksheligi – uıaly telefondy eshqandaı qosymsha jabdyqsyz tikeleı spýtnıkke qosý múmkindigi. Bul ınnovasııa uıaly baılanys munaralary joq taýly aımaqtar men shalǵaı aýyldarda baılanys máselesin túbegeıli sheshpek.
Jobany engizý kezeń-kezeńimen júredi:
- Bastapqy kezeńde paıdalanýshylarǵa SMS-habarlamalar jiberý qyzmeti ashylady. Keıin dybystyq baılanys pen basqa da servıster qoljetimdi bolady;
- 2027 jyly negizgi qyzmet túrleriniń basym bóligi tolyq iske qosylady.
«Bul bastama Memleket basshysynyń eldi tolyq sıfrlandyrý jónindegi tapsyrmasyna sáıkes keledi. Barlyq óńirde sıfrlyq qyzmetterdiń senimdi jumys isteýi úshin zamanaýı baılanys arnalary qajet. Spýtnıktik baılanys – osy arhıtektýranyń mańyzdy bóligi. Eń maǵyzdysy – árdaıym baılanysta bolý múmkindigi. Tótenshe jaǵdaılarda, shalǵaı óńirlerde nemese jolda bul qyzmet túri sheshýshi ról atqarady. Mundaı tehnologııalar sıfrlyq turaqtylyqty arttyryp, azamattardyń ómir sapasyn jaqsartady», dedi Jaslan Madıev.
Osylaısha, Qazaqstan jahandyq ozyq tehnologııalardy ıgerýde Ortalyq Azııa boıynsha kósh bastap, sıfrlyq turaqtylyqty jańa deńgeıge kótermek.
