Kollajdy jasaǵan – Záýresh SMAǴUL ,«EQ»
«Cońǵy alty jylda elektr energııasyn óndirý 16 mıllıard kılovatt-saǵatqa artty. Bul Qaraǵandy oblysy sııaqty óndirisi órkendegen aımaqtyń bir jyldaǵy qýat tutyný kólemimen birdeı. Qazirgi kezde Qazaqstannyń elektr energetıkasy júıesine jalpy qýaty 25 gıgavattan asatyn 237 elektr stansııasy kiredi. Al is júzinde qoldanystaǵy jalpy qýat kólemi – 21 gıgavatt. Memleket júrgizip otyrǵan júıeli sharalardyń arqasynda energııa nysandary men ınjenerlik-kommýnaldyq jelilerdiń ornyqtylyǵy aıtarlyqtaı kúsheıdi. О́tken jylǵy jylytý maýsymynda tehnologııalyq aqaýlar 27 paıyzǵa qysqardy. Toǵyz jylý elektr ortalyǵy táýekeldiń «qyzyl» aımaǵynan shyqty, al úsh stansııa «jasyl» aımaqqa ótti», Memleket basshysy.
Sonymen qatar Prezıdent 2030 jylǵa deıin keminde 200 nysanǵa rekonstrýksııa jasalatyny, 86 myń shaqyrym jeli jańaratynyn atap ótti. Bul oraıda Qasym-Jomart Toqaev ınfraqurylymdy qalypty deńgeıde ustap turý úshin «Tarıfti ınvestısııaǵa aıyrbastaý» baǵdarlamasy iske qosylǵanyn eske saldy.
«Sonyń nátıjesinde úsh jyl ishinde tek kásiporyndardyń kúrdeli jóndeý jumystaryna 900 mıllıard teńgeden astam jeke ınvestısııa tartyldy. Bul jumystyń qarqynyn báseńdetpeý kerek. Aldymyzda senimdi ári zamanaýı energetıka ınfraqurylymyn qalyptastyryp, ekonomıkanyń damýyna tıisti jaǵdaı jasaý mindeti tur. Osy oraıda Úkimet «Energetıkalyq jáne kommýnaldyq sektorlardy jańǵyrtý» jónindegi ulttyq jobany iske asyra bastady. Onyń aıasynda 2030 jylǵa deıin keminde 200 nysanǵa rekonstrýksııa jasalady, 86 myń shaqyrym jeli jańarady. Úkimetke elimizdiń energetıkalyq áleýetin udaıy arttyrý mindeti júkteldi. Bul – Qazaqstannyń ekonomıkalyq damýyn odan ári tabysty júzege asyrý úshin asa mańyzdy. Elimiz eksporttyq áleýeti zor energetıkalyq derjavaǵa aınalýy kerek», dedi Memleket basshysy.Prezıdent salada taıaý jyldary atqarylatyn naqty jumys baǵyttaryn atap ótti.
«Qazaqstannyń energetıkalyq áleýetin nyǵaıtý – basymdyqqa ıe mindet. Bıyl batys aımaqtardyń elektr jelisin kúsheıtetin biregeı joba aıaqtalady. Bul joba Batys Qazaqstan, Atyraý, Mańǵystaý oblystarynyń energetıkalyq toraptaryn biriktiredi. Endi osy toraptardy biryńǵaı ulttyq energetıka júıesine jalǵaý qajet. Elimizde basqa da iri jobalar qolǵa alynyp jatyr. Atap aıtqanda, Ekibastuzdaǵy ekinshi GRES-te jańa energobloktar salynady. Sondaı-aq úshinshi GRES-tiń qurylysy bastalmaq. Bul nysandar elimizdegi energetıka jetispeýshiligin joıýǵa tıis. 2026 jyly Almatydaǵy elektr stansııalaryn jańǵyrtý – Úkimet pen ákimdik aldynda turǵan mańyzdy maqsat. Sol arqyly aýanyń lastaný deńgeıin tómendetip, qalanyń ekologııalyq ahýalyn jaqsartý qajet. Buǵan qosa, kelesi jyly Qyzylorda jáne Túrkistan oblystarynda bý-gaz qondyrǵysy bar elektr stansııalaryn tolyq iske qosý kerek. Biz 2035 jylǵa deıin 26 gıgavattan astam qýat kózin óndiretin nysandardy iske qosýdy josparlap otyrmyz», dedi Memleket basshysy.
