Osy rette Abaı oblysy sanıtarlyq-epıdemıologııalyq baqylaý departamentiniń (SEBD) tehnıkalyq reglamentterdi baqylaý bóliminiń basshysy Serikbolsyn Nazarbekov О́ńirlik kommýnıkasııalar qyzmeti alańynda bolǵan brıfıngte óńirde satylatyn azyq-túlik ónimderiniń sapasyn baqylaý týraly jan-jaqty áńgimeledi.
«Sanıtarııalyq-epıdemıologııalyq baqylaý organdary EAEO tehnıkalyq reglamentteri men gıgıenalyq normatıvterge sáıkestigin anyqtaý úshin ónimge turaqty monıtorıng júrgizedi. Negizgi maqsat – talaptardyń oryndalýyn tekserý. Osy jyldyń 10 aıynda sala mamandary 784 taýardy tekserdi, onyń 441-i – azyq-túlik: sút, nan-toqash, qus eti, jumyrtqa, kondıter ónimderi. 42 taýar tehnıkalyq reglamentke sáıkes kelmedi», dedi S.Nazarbekov.
Oblystyq SEBD-nyń tamaq obektilerin baqylaý bóliminiń basshysy Aıgerim Musataevanyń aıtýynsha, taǵam ónimderin daıyndaý barysynda asa muqııat bolatyn biraz jaıt bar.
«Búginde jıi kezdesetin ýlaný túri – zııandy mıkroaǵzalar. Mundaı aýrý týdyratyn bakterııalar ónimge bastapqyda juǵýy nemese durys saqtalmaýy men daıyndalýy saldarynan paıda bolady. Organızmge túsken jaǵdaıda ýlanýǵa ákeledi. Infeksııa tasymaldaýshylar taraqan, tyshqan, egeýquıryq, shybyn bolýy múmkin. Taǵamnan ýlanýdyń aldyn alý qarapaıym gıgıena saqtaý, daıyndaý erejelerin oryndaýǵa baılanysty. Eger taǵamnan jaǵymsyz ıis shyqsa nemese qyshqyl dám sezilse, ondaı ónimdi tutynbaǵan jón. Qaptamanyń isinýine de nazar aýdaryńyz, bul da ónimdi jeýge bolmaıtynyn bildiredi», dedi A.Musataeva.
Mamannyń aıtýynsha, ishek ınfeksııalarynyń kóptegen túrin tolyq joıýǵa keminde 10 mınýt termııalyq óńdeý qajet. Temperatýra 70 gradýstan tómen bolmaýǵa tıis. Dál osy temperatýrada qaýipti bakterııalar joıylady.
«Taǵamdy bólme temperatýrasynda eki saǵattan artyq saqtaýǵa bolmaıdy, áıtpese ishek ınfeksııasyna shaldyǵý qaýpi artady. О́nim tolyq óńdelýge tıis, sondyqtan qaınatylǵan et qýyrylǵan etke qaraǵanda qaýipsiz. Sondaı-aq ónimder kir qol arqyly da lastanýy múmkin ekenin esten shyǵarmaý kerek. Barlyq shıki taǵam aldyn ala óńdeýden ótýge tıis, kókónister men jemisterdi aǵyn sýmen jaqsylap jýý qajet. Taýyq jumyrtqasy salmonellez tasymaldaýshysy bolýy múmkin», deıdi A.Musataeva.
Sonymen qatar taýar tasymaldaý erejesin qatań saqtaý kerek. Shıki, daıyn ónimderdi bir-birinen bólek saqtaý, sonymen qatar daıyn tamaqty tońazytqyshqa qoıý aldynda mindetti túrde sýytý qajet. «Ishek ınfeksııalaryn kóbeıtý qaýpi, ásirese, kóshe saýdasynda joǵary. О́nimdi ruqsat etilgen jerden ǵana satyp alý kerek, sebebi veterınarlyq jaǵdaıy belgisiz taǵam ónimderi ınfeksııaǵa sebep bolýy múmkin», deıdi maman.
Oblystyq SEBD basshysynyń orynbasary Raýshan Fathýllına qazan aıynda Semeıde balanyń kámpıtten ýlaný oqıǵasy tirkelgenin aıtty. Oqýshy dúkennen kámpıt satyp alyp, ony jegennen keıin ózin nashar sezingen.
«Mıkrobıologııalyq zertteý nátıjesinde kámpıtte ishek taıaqshasy tobynyń bakterııalary anyqtaldy. Sonymen qatar ónimde qazaq tilindegi tańbalaý bolmaǵan, quramy men jaramdylyq merzimi kórsetilmegen. Dúkende taýarǵa ilespe qujattar, sapaǵa sáıkestik deklarasııasy, basqa da qujattar bolmaǵan. Kásipker kámpıtterdi qolma-qol aqshaǵa kóterme bazardan alǵanyn aıtqan. Atalǵan faktige qatysty jeke kásipkerge ákimshilik hattama toltyryldy, qalǵan ónim tárkilenip, joıyldy», dedi R.Fathýllına.
Qorektik zattardyń jetispeýshiligi, quramynda bakterııalar men hımııalyq qospalardyń mol bolýy adam densaýlyǵyna zııan deıdi mamandar. Sondyqtan árbir ónimniń shyǵý tegin, saqtaý sharttaryn, óndiris sapasyn qatań qadaǵalaý mańyzdy.
Abaı oblysy
