Delegasııa quramynda 15 qatysýshy bar. Olar biliktiligin arttyrýdy kózdegen oblystyń qoǵamdyq keńes músheleri men úkimettik emes uıym ókilderi. Sonyń biri – Mańǵystaý oblysy Munaıly aýdandyq qoǵamdyq keńes múshesi Raıhan Mýsaeva.
– Birinshi kúni depýtattar men qoǵamdyq keńes múshelerine sarapshy Gúlmıra Qorǵanbaeva «Aımaqtardyń strategııalyq damýy» taqyrybynda trenıng ótkizdi. Jıynda aımaqtyq strategııany tıimdi josparlaýdaǵy negizgi tásilder talqylandy. Tolǵandyrǵan saýaldarymyzdy qoıyp, oı-pikirmen bólistik. Keıin Mádenıet jáne aqparat mınıstrligi ókilderimen júzdesip, memlekettik saıasattyń ózekti baǵyttary, azamattyq qoǵamdy qoldaý tetikteri men qoǵamdyq keńesterdiń qyzmeti jaıynda keń kólemde aqparat aldyq. Osy kezdesýlerdiń nátıjesinde damý josparyn qurý úshin komandaǵa túrli mashyq pen qabileti bar tórt tıptegi mamandy tartý qajettigin túsindim, – dedi R.Mýsaeva.
Joba Mańǵystaý oblysynyń Aqparat jáne qoǵamdyq damý basqarmasynyń tapsyrysymen «Mańǵystaý oblysy Azamattyq alıansy» ZTB uıymdastyrǵan. Maqsat – óńirdiń belsendilerin qoldaý, azamattyq qoǵam ınstıtýtyn nyǵaıtý jáne qoǵam men memlekettik organdar arasyndaǵy júıeli baılanys ornatý.
Qatysýshylar ekinshi kúni Qazmedıa ortalyǵyna baryp, 22 qabatty teleortalyq ǵımaratyn aralady. Stýdııalardyń jumysyn kórip, Ortalyq kommýnıkasııalyq qyzmetiniń brıfıngteri ótetin alańǵa bardy. Odan keıin Senat depýtattarymen júzdesti. Erteńine Májilis depýtattarymen kezdesip, zań shyǵarý úderisi, qoǵammen keri baılanys ornatý jóninde áńgimelesti. О́ńir belsendileri «Qazaqstan halqyna» qorynyń baǵdarlamalary, áleýmettik jobalardy qoldaý jáne óńirlik bastamalarymen tanysty.
– Týr kezinde uıymdastyrylǵan is-sharalar qatysýshylardyń kásibı saýatyn arttyrýǵa, halyqpen etene baılanysyn kúsheıtýge, azamattyq belsendiligin shyńdaı túsýge baǵyttalǵan. Mundaǵy 15 adam túrli baǵytta eńbek etedi. Aralarynda muǵalimder, medısına qyzmetkerleri de bar. Biraq bárimizdi biriktiretin ortaq ustanym – elge qyzmet etý, qoǵamǵa paıdaly bolý, ońtaıly ári tıimdi jumys júıesin qalyptastyrý, – dedi Mańǵystaý oblysy Qoǵamdyq keńesiniń múshesi Qaıyrǵalı Qalmuqanov.
