Nanospýtnık Ziwei Aerospace kompanııasynyń «Dıer-5» (Iаo-8 mıssııasy) ǵarysh apparaty arqyly «Kýaıchjoý-11» zymyran tasyǵyshymen orbıtaǵa jetkizildi.
Ǵaryshtyq zertteýlerge arnalǵan bul qurylǵy Soltústik-Batys polıtehnıkalyq ýnıversıteti (SBPÝ) men Ál-Farabı atyndaǵy Qazaq ulttyq ýnıversıteti birlesip ázirlegen. Nanospýtnık maqsattardy joǵary turaqtylyqpen manevrli baqylaý, ıkemdi sensorlarǵa negizdelgen platforma orıentasııasyn dınamıkalyq qabyldaý jáne kompensasııalaý, sonymen qatar OpenHarmony ashyq bastapqy kody bar operasııalyq júıege negizdelgen qashyqtan zondtaý keskinderin avtonomdy taný sııaqty birneshe negizgi mindetterdi atqarady.
Onyń negizgi tórt artyqshylyǵy bar: kommersııalyq komponentter men ınnovasııalyq dızaın arqyly joǵary ekonomıkalyq tıimdilik; joǵary turaqtylyq pen dál baǵyttaý; orıentasııa qatelerin beıimdelgen túrde kompensasııalaýǵa arnalǵan joǵary esepteý qýaty; derekterdi Jerge jyldam alyp-jetkizý úshin joǵary operatıvtik árekettestik.
Jobaǵa QazUÝ bazasyndaǵy SBPÝ fılıaly, «Bir beldeý – bir jol» bastamasy aıasyndaǵy ulttyq birlesken zertteý laboratorııasy, Áýe-ǵarysh ınstıtýty jáne Ikemdi elektronıka ulttyq negizgi zerthanasy qatysty.
Jobanyń konsýltanty – akademık Hýan Veı, jalpy jetekshisi – professor Iýe Sıaokýı, jetekshiniń orynbasary – QazUÝ professory Záýre Raqysheva. Birlesken zertteý tobyna Qytaı men Qazaqstannan 20-dan astam maman jáne jas zertteýshiler jumyldyrylǵan.
Birlesken jumys ǵaryshty zertteý, bilikti mamandar daıarlaý jáne ortaq spýtnıkterdi jasaý, sondaı-aq, mıkrospýtnık arqyly Jerdi qashyqtan zertteýge múmkindik beredi.
