Sýretti túsirgen – Erlan OMAR, «EQ»
Alqaly jıyn aıasynda bıyl týǵanyna 75 jyl tolǵan qalamgerdiń «Jyldar men joldar…» atty ıllıýstrasııalyq-kitap kórmesi qoıylyp, arnaıy beınerolık usynyldy. Jazýshynyń kórkem týyndylaryna sholý jasalyp, ádebıettegi joly men shyǵarmashylyq álemi jaıly estelikter aıtyldy.
Qalamger týraly esteliktermen kómkerilgen ádebı is-sharany alashtanýshy ǵalym, fılologııa ǵylymdarynyń doktory Aıgúl Ismaqova ashyp, júrgizip otyrdy. Ol óz tarapynan jazýshynyń azamattyq kelbetine toqtalyp, óziniń maqalany qazaqsha jazýyna Jumabaı Shashtaıuly tikeleı áser etkenin, qalamgerdiń ultshyl, otanshyl qasıetterin atap ótti. Mádenıet jáne aqparat mınıstrligi Arhıv, qujattama jáne kitap isi komıtetiniń tóraǵasy Rýstam Álı Memleket basshysynyń tapsyrmasymen qalamgerlerdi, kitaptardy nasıhattaý baǵytyndaǵy jumystarmen, iske asyp jatqan jobalarmen tanystyrdy.
Sondaı-aq jazýshy, Qazaqstannyń eńbek sińirgen qaıratkeri Qýanysh Jıenbaı qalamgerdiń ózine erekshe unaǵan «Aspanqora» povesine toqtaldy. Shaǵyn ǵana shyǵarmada adamnyń taǵdyry tamasha sýrettelgenin aıtty. Aqyn, jazýshy, jyrshy Baıanǵalı Álimjanov óziniń aıtysta júrip, ádebıetke aralasýyna Jumabaı Shashtaıuly jol ashqanyn, «Qazaq ádebıeti» gazetinde bas redaktor bolǵanda shyǵarmalary basylǵanyn jetkizdi. Al belgili ǵalymdar Kárimbek Qurmanálıev, Amantaı Shárip, Dıhan Qamzabekuly, ádebıet synshysy Amangeldi Keńshilikuly, jazýshynyń basqa da zamandastary pikirlerin aıtty.
Qazirgi qazaq prozasynda ózindik qoltańbasymen kórinip, ádebıet áleminde sony soqpaǵyn salǵan Jumabaı Shashtaıulynyń tórt tomdyq tolyq shyǵarmalar jınaǵynyń birinshi tomyna adam jan dúnıesindegi túrli qubylystar men tabıǵattyń tylsym syrlary názik sheberlikpen sýretteletin povester men áńgimeler jınaqtalǵan. Ekinshi tomyna keshegi keńestik kezeńniń óliara tusyndaǵy qoǵamnyń «partnomenklatýra» dep atalatyn bólsheginiń qupııaǵa toly qatparlaryn tereń ashýǵa arnalǵan «Aıaz bı» romany engen. Jazýshynyń úshinshi tomyna sosrealızmge boı aldyrmaı, malshynyń mashaqatqa toly aýyr tirshiligi men jastardyń qajyr qaıratyn sýrettegen «Qyzyl qar» romany enip otyr. Eń alǵash 1984 jyldy povest bolyp jaryq kórip, «repressııaǵa» ushyraǵan shyǵarma 30 jyldan keıin qaıta jazylyp, romanǵa aınaldy. Sondaı-aq bul tomǵa atakásiptiń beınetin belshesinen keshken qazaqtar, qalaǵa endi ǵana ornalasyp, úlken murat kózdegen bolashaq zııaly qaýym ókilderi sýretteletin «Zamana ıleýi» romany da engen. Al tórtinshi tomy – qalamgerdiń jýrnalıstıkadaǵy uzaq jylǵy ǵumyryna oısha kóz júgirtip, ótkenine syn kózben qaraǵan ómirbaıandyq tolǵanysy. Avtor aýdandyq gazettegi segiz jylynan bastap, Almatydaǵy respýblıkalyq basylymǵa qyzmetke ornalasqan kezeńin, shyǵarmashylyq izdenisteri men kásibı ortadaǵy qarym-qatynastaryn búkpesiz baıandaıdy.
Kitaptar shyǵarma jelisimen salynǵan ıllıýstrasııalyq sýrettermen bezendirilgen. Jınaq 3 000 dana taralymmen shyǵyp, respýblıkanyń barlyq kitaphanasyna tarady.
