Munaıly shaharda ósken ol bala kezinen belsendigilimen tanyldy. Mektepte oqı júrip, aǵylshyn tilin jetik meńgerýge talpyndy. Sýda júzýdi unatty. «Juldyz» bı ansambliniń beldi múshesi boldy. Marafonǵa birneshe ret qatysty. Eń basty armany – ushqysh bolý.
«Bala kezimnen erkindikke, bıikke qushtar edim. Mekteptiń 9-synybynda kásibı baǵdar berý kýrsyna qatystym. Sol kezde bolashaq mamandyǵyma qatysty saýaldama suraǵyna ushqysh bolatynymdy kórsettim. Bul úshin sheteldegi bedeldi joǵary oqý ornynda bilim alýdy kózdedim», deıdi Nuraı Bısenova.
Bul maqsatyna birden qol jetkizý ońaı bolmady. Aldymen Chehııaǵa vıza alýǵa birneshe ret qadam jasady. Sol elge baryp, emtıhanǵa daıyndaldy. Taýdaı talpynysynyń nátıjesinde osyndaǵy tehnıkalyq ýnıversıtettiń mehanıkalyq ınjenerııa fakýltetine oqýǵa tústi. Bul – Ortalyq Eýropadaǵy baıyrǵy joǵary oqý orny.
«Qazir «Professional Pilot» baǵdarlamasymen 2-kýrsta oqyp júrmin. Grantqa ıe bolǵanmyn. Birinshi kýrsta ushý aldyndaǵy daıyndyqtan óttik. Teorııany oqyp, bir motorly ushaqpen ushtym. Eń este qalarlyq oqıǵa – týǵan kúnimde «Private Pilot License» úshin teorııalyq emtıhandy sátti tapsyrýym. Al jazda «Single Engine Pilot» lısenzııasyn aldym. Ushaq shtýrvaline otyrý – umytylmaıtyn sát. Kók aspanǵa kóterilip, áýeden jerge qaraýdyń áserin sózben jetkizý múmkin emes», deıdi aspanǵa ǵashyq arý.
Onyń aıtýynsha, kásibı ushqysh bolý úshin tabandylyq pen batyldyq qajet. Temirdeı tártipti saqtaǵan jón.
«Bı úıirmesi tártipke boı úıretýime áser etti. Qazir sonyń paıdasyn kórip júrmin. Ushqysh bolamyn degenimde, ata-anam bul tańdaýyma tańdanyspen qaraǵan edi. Olar «Ushqysh bolý – qyzdardyń kásibi emes» dedi. Biraq men tańdaýymdy ózgertpeýge sheshim qabyldadym», deıdi N.Bısenova.
Atyraý oblysy
