Foto: Ashyq derekkóz
Qazirgi ýaqytta Úkimet qaraýynda jatqan Tujyrymdama úsh negizgi baǵyt boıynsha iske asyrylmaq:
1.Kóshi-qondy sıfrlyq baqylaý
Jańa júıeniń ózegi – Migration.enbek.kz platformasy bolmaq. Bul biryńǵaı sıfrlyq júıe Eńbek, Ishki ister, Syrtqy ister, Ǵylym jáne joǵary bilim mınıstrlikteriniń derekterin biriktiredi. Bul ıntegrasııa mıgranttardyń kelýinen bastap, olardyń jumysqa ornalasýy men áleýmettik jaǵdaıyna deıingi prosesterdi tolyq baqylaýǵa, sondaı-aq aldaǵy úrdisterdi dál boljaýǵa múmkindik beredi.
«Budan basqa, enbek.kz júıesin Ulttyq bilim berý bazasymen jáne basqa da aqparattyq resýrstarmen ıntegrasııalaý josparlanýda, bul túlekterdiń, qonys aýdarýshylardyń jáne memlekettik baǵdarlamalarǵa qatysýshylardyń jumysqa ornalasýy týraly monıtorıngti qamtamasyz etedi», delingen habarlamada.
2. Ishki kóshi-qon jáne óńirlik tepe-teńdik
Tujyrymdama óńirler arasyndaǵy eńbek resýrstarynyń teńsizdigin joıýdy kózdeıdi. Ol úshin:
- Elimizdiń soltústik, shyǵys jáne ortalyq oblystaryna qonys aýdarý úshin arnaıy óńirlik kvotalar bólinedi.
- Qonys aýdarýshylar men qandastar úshin jeńildikpen kredıt berý, kooperasııany damytý jáne shaǵyn bıznesti qoldaý sharalary iske asyrylady.
«Osy baǵytty iske asyrý eńbek resýrstaryn ońtaıly qaıta bólýge, jumyspen qamtý deńgeıin arttyrýǵa jáne óńirlerdiń demografııalyq áleýetin nyǵaıtýǵa yqpal etetin bolady», delingen habarlamada.
3. Syrtqy kóshi-qon jáne otandastardy qoldaý
Syrtqy saıasatta shetelde júrgen Qazaqstan azamattarynyń quqyqtaryn qorǵaýǵa basymdyq beriledi. Osy maqsatta Eýropa men Azııa elderimen ekijaqty kelisimder jasasý jáne sheteldegi eńbek mıgranttaryn monıtorıngteý platformasyn qurý josparlanǵan.
Sonymen qatar, bilikti sheteldik mamandar men stýdentterdi tartý, sondaı-aq tarıhı otanyna oralǵan qandastardy beıimdeýdiń biryńǵaı standarty ázirlenip, «Ata joly» kartasy jetildiriledi.
Mınıstrlik Tujyrymdamany iske asyrý úshin 73 is-shara men 14 nysanaly ındıkatordan turatyn is-qımyl josparyn daıyndady. Aıta keterligi, qujatty qabyldaý memlekettik bıýdjetten qosymsha qarajatty talap etpeıdi.
