Jańa formattaǵy bilim ordasynyń jalpy aýmaǵy 15 myń sharshy metrden asady. Munda oqýshylardyń sapaly bilim alyp, jan-jaqty damýy úshin 77 pán kabıneti jabdyqtalǵan. Mektepte dástúrli synyptardan bólek, robototehnıka, STEM-zerthanalar, dızaın jáne tehnologııa, vızýaldy óner, mýzyka jáne tamaqtaný mádenıeti sııaqty arnaıy baǵyttaǵy kabınetter jumys isteıdi.
Mektep dırektory Lıýbov Namnyń aıtýynsha, jańa ǵımarat tek bilim berý orny emes, balalardyń sıfrlyq saýattylyǵy men shyǵarmashylyq áleýetin arttyratyn zııatkerlik keńistikke aınalmaq.
«Búginde memleketimizdiń basty basymdyqtarynyń biri – sapaly bilim berý júıesin qalyptastyrý. Osy oraıda, «Keleshek mektepteri» ulttyq jobasy aıasynda boı kótergen jańa bilim ordasy – bizdiń mektebimiz, osy bastamanyń jarqyn kórinisi dep bilemiz. Mektep ujymy – tájirıbeli, jańashyl ustazdardan quralǵan. Biz bilim men tárbıeni teń ustaýdy basty mindet sanaımyz. Balanyń jan-jaqty damýy, qaýipsiz ortada erkin oılap, óz bolashaǵyn qalyptastyrýy – bizdiń kúndelikti jumysymyzdyń negizi. Osy múmkindikti paıdalana otyryp, barlyq ata-analardy, qoǵam múshelerin mekteppen tyǵyz baılanysta bolýǵa, bilim berý isine qoldaý bildirýge shaqyramyn», dep atap ótti mektep basshysy.
Erekshe bilim berýdi qajet etetin balalar úshin mektepte kedergisiz orta qalyptasqan: arnaıy jedelsatylar, ınklıýzıvti qoldaý kabınetteri men sensorlyq bólmeler qarastyrylǵan. Sonymen qatar qaýipsizdik máselesine de basymdyq berilip, 126 beınebaqylaý kamerasy ornatylǵan. Mektep aýlasynda sporttyq jáne oıyn alańdary tolyq jabdyqtalǵan.
Aıta keteıik, buǵan deıin Mańǵystaý oblysynda osy joba aıasynda 11 myńnan astam oqýshyǵa arnalǵan 12 mektep ashylǵan bolatyn. Búgingi №35 mekteptiń iske qosylýymen óńirde josparlanǵan barlyq 13 bilim nysany halyq ıgiligine berildi.
