Foto: istockphoto.com
Kásiporynnyń tehnologııalyq deńgeıi óte joǵary sanalady ári mundaı aýqymdaǵy óndiris Eýrazııalyq ekonomıkalyq odaq keńistiginde sırek kezdesedi. Petropavl qalasynda ornalasqan zaýyt jańa qoıýlatylǵan sút shyǵarý jelilerimen jabdyqtalyp, sútti óńdeý men qoıýlatý úderisiniń barlyq kezeńine tolyq tehnologııalyq baqylaý engizilgen. Qazir barlyq jabdyq ornatylyp, kásiporyn óndiristik prosesterdi retteý men synaqtan ótkizý kezeńine kóshti. О́ndiriste paıdalanylatyn shıkizat tek Soltústik Qazaqstan oblysyndaǵy fermerlerden jetkiziledi, ónim tolyqtaı tabıǵı ári joǵary sapaly bolmaq.
Eurasian Milk kompanııasyna tıesili barlyq óndiristik jelilerdi ónerkásiptik iske qosý kelesi jyldyń birinshi toqsanyna josparlanǵan. Jobanyń iske asýy eldegi sút ónerkásibiniń damýyna serpin berip, eksporttyq áleýetti arttyrýǵa ári ishki naryqty sapaly otandyq ónimmen qamtamasyz etýge múmkindik beredi. Zaýyt táýligine 350 tonnaǵa deıin, ıaǵnı jylyna 125 myń tonna sút qabyldap, tazalaı alatyn qýatqa ıe. Munda jartylaı qatty, qatty jáne jumsaq irimshikter, sary maı, qoıýlatylǵan sút, qyshqyl sút ónimderi óndirilip, olar ýltra-klın qaptamasynda býyp-túıiledi. Buǵan qosa sút sarysýyn tereń óńdeý arqyly durys ári sporttyq tamaqtanýǵa arnalǵan ónim shyǵarý da negizgi baǵyttardyń biri retinde aıqyndalǵan.
Eurasian Milk bas dırektory Andreı Grısenko jobanyń strategııalyq mańyzyna toqtalyp, zaýyttyń bolashaqqa baǵyttalǵanyn atap ótti. Onyń aıtýynsha, alǵashqy kezeń aıasynda salynǵan ınvestısııa kólemi 80 mln dollarǵa jetken. Bul tek bir kásiporynnyń emes, tutas óńir ekonomıkasynyń damýyna qosylǵan eleýli úles. Kompanııanyń basty maqsaty – ishki naryqtaǵy otandyq ónim úlesin arttyrý, ımportqa táýeldilikti azaıtý men otandyq tutynýshyǵa tabıǵı, sapaly ári qaýipsiz ónim usyný. Bas dırektor zaýyttyń eldiń azyq-túlik qaýipsizdigi men agroónerkásiptik keshendi damytýda mańyzdy ról atqaratynyna senim bildirdi.
Joba elimizdiń tamaq ónerkásibi salasyndaǵy eń iri óndiristik ınvestısııalardyń biri sanalady. Eurasian Milk ınvestısııanyń edáýir bóligin óz qarajaty esebinen júzege asyryp, qarjylyq táýekelderdi tolyq óz moınyna alǵan. Bul bastama Memleket basshysynyń Joldaýynda belgilengen mindettermen tolyq úndesedi. Sondaı-aq kompanııa ishki naryqty otandyq ónimmen qamtý jáne ımportty almastyrý baǵytyndaǵy qosymsha táýekelderdi de qabyldaǵan.
Jobanyń alǵashqy kezeńi 10 myń sharshy metrden astam óndiristik ári ınjenerlik ınfraqurylymdy salýdy, negizgi tehnologııalyq baǵyttardy iske qosýdy qamtydy. Zaýytta sý, salqyndatý, bý, elektrmen qamtamasyz etý júıeleri bar zamanaýı energetıkalyq ınfraqurylym qalyptastyryldy.
Kompanııaǵa fermerlerdiń áleýetin damytý da mańyzdy baǵyttardyń biri. Soltústik Qazaqstan oblysy sút sharýashylyǵyn órkendetýge tarıhı turǵyda qolaıly óńir sanalady. Alaıda turaqty ótkizý júıesinsiz óndiris kólemin arttyrý qıyn. Eurasian Milk jylyna 125 myń tonnaǵa deıin fermerlik sútti óńdeýdi kózdeıdi. Osy maqsatta fermerlermen birlesip, jemshóp sapasyn jaqsartý, mal kútimi men densaýlyǵyn baqylaý, súttiń ózindik qunyn tómendetý arqyly shıkizat sapasyn arttyrý baǵytynda jumys júrgiziledi.
Qazir elimizde tereń óńdelgen sút ónimderi naryǵynda ımporttyq taýarlar basym. Bul otandyq óndirýshiler úshin básekelestikti kúsheıtip otyr. Andreı Grısenkonyń aıtýynsha, mundaı jaǵdaıda otandyq óndiristi memlekettik deńgeıde qoldaý strategııalyq mańyzǵa ıe. Damyǵan elderdiń tájirıbesi kórsetkendeı, ulttyq brendterdi júıeli qoldaý otandyq ónimniń qundylyǵyn arttyryp, tutynýshylar senimin nyǵaıtady. Bul óz kezeginde ekonomıkalyq turaqtylyqtyń mańyzdy faktory bolyp sanalady.
