Prezıdent Azııa men Eýropa baǵytynda qurlyq jolymen tasymaldanatyn júktiń 80 paıyzdan astamy Qazaqstan arqyly ótetinin atap ótti.
«Ortalyq Azııanyń Shyǵys pen Batys, Soltústik pen Ońtústik arasyndaǵy negizgi saýda joldaryn toǵystyratyn kólik-logıstıka salasy Japonııa úshin tyń múmkindikterge jol ashady. Azııa men Eýropa baǵytynda qurlyq jolymen tasymaldanatyn júktiń 80 paıyzdan astamy Qazaqstan arqyly ótedi. Transkaspıı halyqaralyq kólik baǵdaryn damytý aıryqsha mańyzdy. Japon Úkimeti Kaspıı teńiziniń Aqtaý portyndaǵy kedendik rásimderdi jetildirýge atsalysýǵa nıetti. Biz bul sheshimdi quptaımyz. Japonııa kompanııalary aldaǵy ýaqytta Orta dálizdiń temirjol, port, avtokólik jáne logıstıka ınfraqurylymyn ilgeriletýge úles qossa, barshamyzǵa paıdaly bolmaq», dedi Memleket basshysy.
Ol «Taza» energetıkanyń damýyn uzaq merzimdi strategııalyq basymdyq retinde qarastyramyzdy da atap ótti.
«Elimiz «jasyl» tehnologııalardy qoldana otyryp, dástúrli qýat kózin ıgerý jáne óńdeý jobalaryna japon tájirıbesin, ınnovasııasy men ınvestısııasyn tartýǵa múddeli.
Geosaıası turaqsyzdyq pen qýat kózderine suranys udaıy artyp kele jatqan jaǵdaıda álem ekonomıkasynyń ornyqty damýyn qamtamasyz etetin kómirsýtegi resýrstary aıryqsha mańyzǵa ıe.
Biz teńgerimdi ári ádil energetıkalyq júıege aýysý qajet degen ustanymdy qoldaımyz.
Qazaqstan kómir óndirisi boıynsha álemdegi on úzdik eldiń qataryna kiredi. Kómir elimizdiń energetıkalyq balansynyń shamamen 70 paıyzyn quraıdy.
Sondyqtan osy tabıǵı baılyǵymyzdy qýatty energııa kózi retinde paıdalaný úshin eń ozyq tehnologııalardy tartýǵa beıilmiz», dedi Prezıdent.
Qasym-Jomart Toqaev Qazaqstannyń resýrs áleýetin Japonııanyń atom energetıkasy salasyndaǵy úzdik tehnologııalarymen ushtastyrý tyń múmkindikterge jol ashatynyn aıtty.
«Iаdrolyq energetıkanyń «jasyl» ekonomıka kún tártibindegi máni zor.
Álemdegi ıadrolyq otynnyń shamamen 40 paıyzyn Qazaqstan qamtamasyz etedi. Dúnıe júzindegi elektr energııasynyń 10 paıyzǵa jýyǵyn atom elektr stansııalary óndiretinin eskersek, bul óte mańyzdy.Qazaqstannyń resýrs áleýetin Japonııanyń atom energetıkasy salasyndaǵy úzdik tehnologııalarymen ushtastyrý osy strategııalyq saladaǵy tyń múmkindikterge, sonyń ishinde ınnovasııalardy engizýge jol ashady.
Ásirese, ıadrolyq qaldyqtardy basqarý, ıadrolyq qaýipsizdik, azamattyq qorǵanys salalaryna joǵary sanatty maman daıarlaý baǵytyndaǵy jobalar qyzyǵýshylyq týdyrady», dedi Memleket basshysy.
