Almaty qalalyq sport basqarmasy jyl úzdikterin anyqtaý maqsatynda Beles Almaty – 2025 sporttyq júldesin ótkizdi. Saltanatty sharaǵa Almaty qalasynyń ákimi Darhan Satybaldy qatysty.
Jyl úzdikterin anyqtaý barysynda grek-rım, erkin jáne áıelder kúresinen Almaty qalalyq federasııasy "Jyldyń úzdik sporttyq federasııasy" atandy. Almatylyq kúres federasııasy 110 sporttyq ujymnyń qatarynan úzdik shyqqan.
Bıyl almatylyq balýandar respýblıkalyq týrnırlerden 141, halyqaralyq jarystardan 34 medal jeńip aldy. Onyń ishinde erkin kúres sheberleriniń enshisinde 83 halyqaralyq, 362 respýblıkalyq dodanyń júldesi bar.
Atap aıtar bolsaq, U17 álem chempıonatynda Nuralı Asqar kúmis júldeger atansa, eresekter arasyndaǵy Azııa birinshiliginde Shamıl Ojaev qola medal jeńip alǵan. Sondaı-aq, túrli jas deńgeıindegi Qazaqstan birinshilikteri, Qazaqstan kýbogy jáne eresekter arasyndaǵy el chempıonatynda almatylyq balýandar turaqty túrde júldege ilikken.
Almaty qalalyq kúres federasııasy respýblıkalyq jáne halyqaralyq týrnırlerdi joǵary deńgeıde ótkizýimen de erekshelenedi. Bıylǵy sporttyq maýsymda Omar Álıev bastaǵan federasııa kúres túrlerinen U17, U20 el birinshiligin, eresekter arasyndaǵy Qazaqstan chempıonaty men PWL týrnırin abyroımen ótkizdi.
Sportshylardyń ekologııalyq taza aýdanda turyp, durys tamaqtanýyn, rejımdi durys ustanýyn qamtamasyz etý maqsatynda balýandarǵa arnaıy jataqhana berildi. Aıta keteıik, kúres túrlerinen Almaty qalalyq federasııasyn 2024 jyldan beri belgili sport menedjeri Omar Álıev basqarady.
