Mereke balalarǵa arnalǵan ertegilik qoıylymmen bastalyp, kishkentaı kórermenderge shattyq pen qýanysh syılady. Sahna tórinde óner kórsetken keıipkerler men anımatorlar balaqaılardyń kóńilin kóterip, alańdy kúlki men shattyqqa bóledi. Jınalǵan kópshilikti Qonaev qalasynyń ákimi Ashat Berdihanov quttyqtap, qala damýyna úles qosyp júrgen turǵyndarǵa alǵysyn bildirdi
«Barshańyzdy jańa jyldyq shyrshany jaǵý merekesimen shyn júrekten quttyqtaımyn! О́tip bara jatqan jylda birlese atqarǵan eńbegimizdiń arqasynda qalamyzdy damytýǵa baǵyttalǵan mańyzdy jumystar júzege asty. Aldaǵy Jańa jyl ár shańyraqqa qýanysh, jańa múmkindikter men ıgi bastamalar ákelsin!» – dedi shahar basshysy.
Qala ákimi balalar úıiniń tárbıelenýshilerimen birge jańa jyldyq shyrshanyń shamyn jaǵyp, dástúrli rásimge qatysýshylarǵa erekshe áser syılady. Osy sátte aspandy jarqyrata otshashý atylyp, merekeniń sánin asha tústi.
Kesh barysynda sahnada jergilikti ónerpazdarmen qatar tanymal ánshiler – Syrym Isabaev, Dana Kentaı jáne Atlantis Live Band óner kórsetti. Balalar anımatorlarmen birge oıyn oınap, merekeniń qyzyǵyna keneldi. Turǵyndar jarqyraǵan shamdarmen kómkerilgen shyrshalar, ásem arkalar men túrli oıynshyqtarmen sýretke tústi.
Qonaev qalasynda ornatylǵan bıylǵy basty shyrshanyń bıiktigi 20 metrdi quraıdy. Qaladaǵy ortalyq alań, saıabaqtar men negizgi kósheler jańa jyldyq naqyshta bezendirilýde.
Almaty oblysy.
