Vedomstvonyń málimetinshe, 19 jeltoqsanda polısııaǵa Almatyda qyz balanyń joǵalyp ketkeni týraly habar túsken. Onyń týysy qyzdyń taýly aımaqqa snoýbord tebýge shyǵyp, keıin baılanysqa shyqpaı qalǵanyn aıtqan.
Osydan keıin dereý TJM-niń aýmaqtyq bólimsheleriniń kúshteri men quraldary jumyldyrylyp, polısııa qyzmetkerleri, TJM qutqarýshylary jáne eriktiler izdestirý jumystaryna tartylǵan. Oqıǵa ornynda Almaty qalasy men Almaty oblysy TJD qyzmetkerleriniń basshylyǵymen jedel shtab qurylǵan.
20 jeltoqsan kúni saǵat 13:04-te izdestirý-qutqarý jumystary barysynda Býtakov sarqyramasy aýdanynda, Býkreev shyńy mańynda joǵalyp ketken áıel adamnyń máıiti tabylǵan.
Marqumnyń denesi Býtakov shatqalyndaǵy baqylaý-qutqarý beketine deıin jetkizilip, polısııa qyzmetkerlerine tapsyryldy. Sot-medısınalyq saraptama taǵaıyndaldy. Qorytyndy sáıkestendirý qajetti saraptamalar aıaqtalǵannan keıin júrgiziledi.
Izdestirý jumystaryna Almaty qalasy men Almaty oblysynyń TJD, qutqarý qyzmeti, Apat medısınasy ortalyǵynyń 73 qyzmetkeri jáne eriktiler qatysqan. Qyzdy izdeýge 10 tehnıka, 5 ushqyshsyz ushý apparaty jáne 3 kınologııalyq eseptop jumyldyryldy.
