Foto: rusnord.ru
Baǵanyń ósýi narazylyq týdyryp otyr
Keıbir kompanııalar dástúrli korporatıvten múlde bas tartsa, al merekelik kóńil-kúıdi saqtap qalǵysy keletinder shyǵyndy qysqartýǵa tyrysyp jatyr.
Korporatıvtiń standartty paketi ádette mynalardy qamtıdy:
- ystyq taǵamdar men salattar;
- sýsyndar (alkogoldi jáne alkogolsiz);
- júrgizýshi men dıdjeı;
- foto jáne beınetúsirilim;
- shoý-baǵdarlama nemese oıyn-saýyq bóligi.
Baǵalar óńirge jáne aptanyń kúnine baılanysty ózgerip otyrady. Jumys kúnderi – 23 myń teńgeden bastalsa, demalys kúnderi – 25 myń teńgeden bastalady.
«Barlyǵy qymbattap jatyr, ásirese ashana men ónim satyp alý shyǵyndary, sondyqtan mázir baǵasy ósip otyr», deıdi meıramhana ókilderi.
Rekordtyq somalar
Eń joǵary baǵalar Almatyda baıqalyp otyr: munda standartty korporatıv 30-50 myń teńge aralyǵynda, al premıým nusqalary 100 myń teńgeden de asyp ketýi múmkin. Astanada baǵalar 20-70 myń teńge aralyǵynda qubylyp tur.
Qazaqstannyń kópshilik óńirlerinde korporatıv quny 20-40 myń teńge deńgeıinde saqtalyp otyr. Al eń qoljetimdi nusqalar Semeı men Aqtóbede anyqtalǵan, munda korporatıvtik keshti bir adamǵa nebári 10 myń teńgege uıymdastyrýǵa bolady.
Qymbattaýdyń sebebi nede?
Ekonomıster korporatıv baǵasynyń ósýi ınflıasııamen tikeleı baılanysty emes ekenin aıtady. Qarjyger Rasýl Rysmambetovtiń túsindirýinshe, basty sebep – suranystyń artýy.
«Barlyǵy jeltoqsan aıynda mereke ótkizgisi keledi, sol sebepti júrgizýshilerge, shef-aspazdarǵa jáne meıramhanalarǵa suranys úshin básekelestik kúsheıedi», deıdi ol.
Osylaısha, maýsymdyq baǵa ósimi kompanııalardyń merekelik kezeńde qyzmetkerlerine jarqyn kesh uıymdastyrýǵa degen umtylysynan týyndap otyr.
Qaı tustardan únemdeý kózdelip otyr?
Kompanııalar sapany tómendetpeı, shyǵyndy azaıtýdyń jolyn izdep otyr. Mysaly, únemdeý úshin mynalardan bas tartýy múmkin:
- ınteraktıvti baǵdarlamalardan;
- bı qoıylymdarynan;
- qosymsha ártisterden.
Alaıda alkogol jáne tájirıbeli júrgizýshi turǵysynda ózgerister bola qoımaıdy.
«Tutynýshylar kóbine orta deńgeıdegi meıramhanany tańdaıdy, biraq myqty júrgizýshini alady. Baǵdarlamadan bas tartýy múmkin, alaıda júrgizýshi mindetti element», deıdi shoýmen Almas Kalemov.
31 arnanyń habarlaýynsha, 2026 jyly merekelik keshterdiń baǵalary qymbattaı túsedi.
