Foto: Ashyq derekkóz
Beıjińdegi rýhanı orda jáne álemdik mereıtoılar
Bıyl Qytaı astanasy Beıjińde Qazaqstannyń mádenıet ortalyǵy saltanatty túrde esigin aıqara ashty. О́ner, til jáne mádenı almasýdyń eń iri alańyna aınalǵan bul ortalyq qysqa merzimde 2000-nan astam adamdy qabyldap úlgerdi. Sonymen qatar 2025 jyly aty ańyzǵa aınalǵan kompozıtor Nurǵısa Tilendıevtiń 100 jyldyq mereıtoıy IýNESKO deńgeıinde atalyp ótti. Halyqaralyq uıym qazaq folklory men zamanaýı mýzykany ushtastyrǵan maestronyń eńbegin álemdik mura retinde joǵary baǵalady.
Abaı rýhy Eýropa men Kavkazda
Uly aqyn Abaı Qunanbaıulynyń 180 jyldyǵyna oraı álem kartasynda jańa nysandar paıda boldy:
- Rımde (Italııa): Qazaq oıshylynyń eskertkishi ornatylyp, eýropalyqtardyń nazaryn aýdardy.
- Oshta (Qyrǵyzstan): Abaı atyndaǵy kóshe, eskertkish jáne mýzeı ashylyp, baýyrlas elderdiń baılanysyn bekemdedi.
- Erevanda (Armenııa): Memleket basshylarynyń kelisimi aıasynda Abaı atyndaǵy saıabaq saltanatty túrde ashyldy.
Sondaı-aq tamyz aıynda Qazaqstan men Qyrǵyzstan Prezıdentteriniń qatysýymen qos halyqtyń maqtanyshy Muhtar Áýezov pen Shyńǵys Aıtmatovqa arnalǵan eskertkish boı kóterip, rýhanı birliktiń sımvolyna aınaldy.
Aqtaý – Túrki áleminiń astanasy
2025 jyly Aqtaý qalasyna Halyqaralyq TÚRKSOI uıymynyń sheshimimen «Túrki áleminiń mádenı astanasy» mártebesi berildi. Kaspıı jaǵalaýynda jıyrmadan astam eldiń óner maıtalmandary bas qosyp, aýqymdy festıvalder men kórmeler uıymdastyryldy. Buǵan qosa, Reseı men Armenııada Qazaqstannyń mádenıet kúnderi, al bizdiń elde Vetnam mádenıeti kúnderi joǵary deńgeıde ótti.
Teatr óneri men jas talanttardyń jeńisi
Otandyq teatrlar da bıyl álemdik sahnalardy baǵyndyrdy. «Astana Opera» teatrynyń gastrolderi shetelde anshlagpen ótip, qazaq operasyna degen qyzyǵýshylyqty arttyrdy. Sonyń ishinde jas daryn Nursultan Ánýarbektiń Reseıdiń Úlken teatrynyń (Bolshoı teatr) Jastar baǵdarlamasyna qabyldanýy qazaq vokal mektebiniń halyqaralyq bedelin taǵy bir márte dáleldedi.
